चीनमधील लिशुई शहरात विकासकामांसाठी ताब्यात घेतलेल्या मालमत्तांच्या बदल्यात विकसित केलेल्या क्षेत्रात जमीन मालकांना प्रती व्यक्ती ४० चौरस मीटर जागा दिली जात आहे. नव्याने विकसित झालेल्या या क्षेत्रात अधिकाधिक जमीन बळकावण्यासाठी तेथील लोक नवनवीन डावपेच आखत आहेत. एका व्यक्तिने तर जास्तीत जास्त जमीन मिळवण्याच्या या प्रयत्नात तब्बल २३ वेळा लग्न केले आहे.
या व्यक्तिचे नाव ‘मिस्टर पॅन’ असे आहे. त्याचे घर या नवीन विकास योजनेअंतर्गत पाडण्यात आले. या बदल्यात त्याला व त्याच्या पत्नीला ४० चौरस मीटर जागा देण्यात आली. नव्याने आखण्यात आलेल्या या योजनेमुळे लिशुई शहरातील जागांचे भाव अचानक वाढू लागले आहेत. या वाढत्या किंमतीचा फायदा घेत अधिकाधिक नफा मिळवण्यासाठी त्याने आपल्या पत्नीला घटस्फोट दिला व तिच्या बहिणीबरोबर लग्न केले. यामुळे नव्या पत्नीच्या नावानेही त्याला जागा मिळाली. त्यानंतर तिलाही घटस्फोट देऊन त्याने आणखी एका मुलीबरोबर लग्न केले आणि तिच्याही नावाने जागा मिळवली. लग्न आणि घटस्फोटांची ही मालिका २३ लग्नांपर्यंत सुरु होती. दरम्यान त्या २३ मुलींच्या नावाने मिळालेली जागाही त्याने बळकावली.
या योजनेअंतर्गत केल्या जाणाऱ्या जमीन घोटाळ्यांना रोखण्यासाठी सरकारने एक चौकशी आयोग नेमला आहे. या चौकशी दरम्यान ज्या पत्त्यावर आधी केवळ दोन लोक राहत होते त्याच पत्त्याखाली तब्बल २३ लोकांना जागा मिळाल्याचे अधिकाऱ्यांना लक्षात आले. त्यानंतर या प्रकरणाची सखोल चौकशी करण्यात आली. यावेळी मिस्टर पॅन याने केलेला हा जमीन घोटाळा उघडकीस आला. घोटाळा उघड झाल्यानंतर पोलिसांनी त्याच्यावर अटकेची कारवाई केली.
