क्रिकेट हा भारतीयांचा आवडता खेळ. अगदी लहान मुलांपासून जेष्ठ मंडळींपर्यंत क्रिकेटचे वेड सर्वांनाच असते. कोणतीही मॅच असली की क्रिकेटप्रेमी ती आवर्जुन पाहतातच. तसेच कामात कितीही व्यस्त असले तरी विकएन्डला, सुट्टीच्या दिवशी क्रिकेट खेळण्यासाठी थोडा वेळ काढतात. तर काही मुलं, मुली क्रिकेटर होण्याचे ध्येय ठरवून त्याचा सराव लहानपणापासूनच सुरू करतात. त्यांची जिद्द अनेक जणांसाठी प्रेरणादायी ठरते. विशेष कौशल्य असणाऱ्या मुला मुलींचे असे काही व्हिडीओ तुम्ही पहिले असतील. असाच लडाखमधील एका मुलीचा व्हिडीओ सध्या प्रचंड व्हायरल होत आहे.
व्हायरल होणाऱ्या या व्हिडीओमधील मुलीचे नाव मकसूमा असून, ती सहावी इयत्तेत शिकते. या व्हिडीओमध्ये मकसूमा क्रिकेट खेळताना दिसत आहे. तिची बॅटींग एखाद्या पारंगत खेळाडूप्रमाणे आहे. तिच्या या कौशल्यावर नेटकऱ्यांनी कौतुकाचा वर्षाव केला आहे. तिने या खेळाचे प्रशिक्षण कसे घेतले आणि तिचा आवडता क्रिकेटर कोण आहे हे विचारल्यावर ती काय म्हणाली पाहा.
आणखी वाचा : आजीच्या मृत्यूबद्दलच्या Linkedin पोस्टमुळे बड्या कंपनीचा CEO ठरतोय टीकेचा धनी; जाणून घ्या संपूर्ण प्रकरण
व्हायरल व्हिडीओ :
या व्हिडीओला आत्तापर्यंत तीन लाखांहून अधिक व्ह्यूज मिळाले आहेत. “शिक्षक आणि वडील मला क्रिकेट खेळण्यासाठी प्रोत्साहित करतात. लहानपणापासूनच मी क्रिकेट खेळायला सुरूवात केली होती, अजुनही मी शिकत आहे.” असे तिने सांगितले. तसेच आवडत्या क्रिकेटरबद्दल विचारले असता, “विराट कोहली माझा आवडता क्रिकेटर असून मला त्याच्यासारखे बनायचे आहे” असे तिने सांगितले. एवढ्या लहान वयातील खेळाची ही आवड आणि कौशल्य पाहून नेटकऱ्यांनी ‘भविष्यात या मुलीला भारतासाठी खेळताना पाहायचे आहे’ अशी इच्छा कमेंट्समध्ये व्यक्त केली आहे.
