Couple Caught Red Hand Viral Video: प्रेमाला काळ,वेळ, वय, अंतर कशाचं बंधन नसलं तरी जागा व प्रसंगाचं भान हे असायलाच हवं. स्वतःचाच नव्हे तर इतरांचाही जीव धोक्यात घालून केलेलं प्रेम हे अक्षरशः घातक म्हटलं जाऊ शकतं. असाच घातक प्रकार छत्तीसगडच्या जशपूरमध्ये घडल्याचे दाखवणारा एक व्हिडीओ सध्या व्हायरल होत आहे. यामध्ये एका जोडप्याला धोकादायक रोमँटिक स्टंट करताना पकडले गेल्याचे दिसतेय. हे जोडपं केटीएम बाईकने प्रवास करताना अश्लील चाळे करत असल्याचे कॅमेऱ्यात कैद झाले होते. यातील तरुण हा गाडी चालवत असताना त्याची प्रेयसी पेट्रोलच्या टाकीवर बसली होती. पोलिस अधीक्षकांनी (एसपी) त्यांना रंगेहात पकडल्यावर त्यांच्यावर कारवाई केली आहे.
विनय असे या दुचाकीस्वाराचे नाव असून तो आपल्या गर्लफ्रेंडला खुश करण्यासाठी हायवेवर स्टंट करत होता. एसपी जशपूर शशी मोहन सिंग यांनी त्यांना त्यांच्या कारमधून पाहिले आणि धोकादायक स्टंट करत असलेल्या जोडप्याचा व्हिडीओ बनवला. शनिवारी (११ मे) दुपारी एसपी कुंकारी येथे जात असताना त्यांना हे जोडपे राष्ट्रीय महामार्ग (NH)-43 वर स्टंट करताना दिसले. एसपी यांनी त्यांचा पाठलाग केला आणि व्हिडीओ बनवला
विशेष म्हणजे, यावेळी विनय हेल्मेट घालून दुचाकी चालवत होता व त्याची १८ वर्षीय मैत्रीण सुहानी दुचाकीच्या पेट्रोल टाकीवर बसली होती. जीवघेणा स्टंट करताना त्यांनी एसपीची गाडी पाहिली आणि पळ काढण्याचा प्रयत्न केला. मात्र, एसपीने त्यांचा पाठलाग करत मोबाईलवर या जोडप्याचा व्हिडीओ शूट केला. हा व्हिडीओ सोशल मीडियावर व्हायरल होत असून त्याला अनेकांनी बघितले आहे.
एसपी शशी मोहन सिंग म्हणाले, “आम्ही या जोडप्याला कुंकुरी ते जशपूरला जाताना एक धोकादायक स्टंट करताना पाहिले, आम्ही त्यांना थांबवले आणि त्यांची चौकशी केली. त्यांनी आम्हाला सांगितले की ते मायली धरणाला भेट देण्यासाठी आले होते आणि स्टंट करत होते. आम्ही त्यांच्यावर कारवाई केली आहे.” प्राप्त माहितीनुसार या जोडप्याला ५०० रुपयांचा दंड ठोठावण्यात आला आहे.
दुसरीकडे, सध्या व्हायरल होणाऱ्या व्हिडीओवर सुद्धा लोक सडकून टीका करत आहेत. “वासनेच्या आहारी गेलेले हे लोक, यांना लाज सोडा पण निदान काळजी तरी वाटली पाहिजे. “अशा पद्धतीच्या कमेंट्स यावर दिसत आहेत. तर काहींना हा मुद्दा उपस्थित केलाय की, “एसपी यांनी पुरावा म्हणून व्हिडीओ शूट केला हे मान्य असलं तरी तो व्हायरल करून त्या जोडप्याची समाज माध्यमावर बदनामी करण्याची गरज होती का?”
हे ही वाचा<< कधी अश्लील भाषा तर कधी चुकीचा स्पर्श; शाळेबाहेर छेड काढणाऱ्याला तरुणीने मास्टरमाईंडने पकडलं, VIDEO पाहाच
दरम्यान हे असे प्रकार घडण्याची ही पहिलीच वेळ निश्चितच नाही. यापूर्वी अनेकदा तरुण- तरुणी याच प्रकारे गाड्यांवर प्रवास करताना अश्लील चाळे करताना दिसले होते. होळीला तर दोन तरुणींचा स्कुटीने प्रवास करतानाचा रोमान्स व्हायरल झाला होता. एकमेकींना रंग लावून, अश्लील हावभाव करत त्यांनी स्वतः असा रील बनवला होता. तर त्या आधी एक तरुणी आपल्या बॉयफ्रेंडला उन्हाचा त्रास होत असल्याने भररस्त्यात त्याच्या अंगावर पाणी ओतून अंघोळ घालताना दिसली होती. त्याही वेळेस अशा जोडप्यांना ऑनलाईन टीका व ऑफलाईन दंड सहन करावा लागला होता. पण काही केल्या ही प्रवासातील रोमान्सची क्रेझ तरुणाईच्या मनातून जात नसल्याचे दिसतेय.
