दिल्लीतील एका बेरोजगार तरुणाने अॅमेझॉनला लाखोंचा गंडा घालता आहे. दोन-तीन महिन्याच्या कालावधीत त्याने अॅमेझॉनवरून जवळपास १६६ महागडे फोन मागवले. हे फोन त्याच्या पत्त्यावर पोहोचल्यानंतर मोबाईलऐवजी रिकामी खोके आले असं सांगून अॅमेझॉनला लुबाडल्याचं समोर आलं आहे. मोबाईलऐवजी रिकामी खोक्यांची डिलिव्हरी होण्याच्या वारंवार तक्रारी आल्यानंतर यात काहीतरी काळंबेरं असल्याचं अॅमेझॉनच्या लक्षात आलं. अॅमेझॉनने दिल्ली पोलिसांत याची तक्रार केली, त्यानंतर संपूर्ण प्रकार उघडकीस आला.
वाचा : अखेर ‘त्या’ जाहिरातीसाठी डव्हने मागितली माफी
दिल्लीत राहणारा २१ वर्षीय तरूण शिवम चोप्रा हा बेरोजगार आहे. दिल्लीतल्या विद्यापीठातून त्याने हॉटेल मॅनेजमेंटचं शिक्षण पूर्ण केलं. पण, शिक्षित असूनही नोकरी न मिळाल्याने त्याने चुकीच्या मार्गानं पैसे कमावण्याचं ठरवलं. यासाठी त्याने फिल्मी स्टाईलने अॅमेझॉनला लुबाडायला सुरूवात केली आणि यातून त्याने एप्रिल ते मे महिन्यात जवळपास ५० लाख रुपये कमावल्याचे दिल्ली पोलिसांनी म्हटलं आहे. शिवम अॅमेझॉनवरून महागडे मोबाईल मागवायचा. त्यांने आतापर्यंत सॅमसंग, अॅप्पल, वन प्लस अशा कंपनीचे १६६ फोन अॅमेझॉनवरून मागवले. दरवेळी तो वेगवेगळे मोबाईल क्रमांक वापरून आपली ऑर्डर द्यायचा. पत्ताही चुकीचा द्यायचा. जेव्हा मोबाईलची डिलिव्हरी घेऊन डिलिव्हरी बॉय पोहोचायचा तेव्हा पत्ता शोधण्यासाठी त्याला अडचणी यायच्या. डिलिव्हरी बॉय पत्ता विचारण्यासाठी नोंदणी केलेल्या मोबाईल क्रमांकावर फोन करायचा, फोन आला की दिलेल्या पत्त्याच्या आसपास असणाऱ्या ठिकाणी डिलिव्हरी बॉयला बोलावून शिवम आपली ऑर्डर स्वीकारायचा.यामुळे कोणालाही शंका यायची नाही. ऑर्डर मिळाल्यानंतर आपल्याला फोनऐवजी रिकामा खोकं आलं असं खोटं सांगून तो रिफंड मागायचा. ऑनलाईन व्यापारात असे प्रकार अनेकदा होतात, त्यामुळे ग्राहकाच्या तक्रारीवर विश्वास ठेवून त्याला रिफंडही मिळायचे. रिफंड मिळाल्यानंतर शिवम मोबाईल फोन काळ्या बाजारात विकायचा.
असं करून त्याने लाखो रुपये कमावले. रिफंड मागण्याचे प्रकार वारंवार होत असल्याचे लक्षात येताच अॅमेझॉनने याची दिल्ली पोलीस स्टेशनमध्ये तक्रार दाखल केली. पोलिसांनी या प्रकरणाचा छडा लावून शिवम आणि आणखी एका व्यक्तीला ताब्यात घेतलं. पोलिसांनी शिवमच्या घरातून १९ महागडे फोन, १२ लाखांची रोख रक्कम आणि ४० विविध बँकाचे पासबुक जप्त केले.
