देश लहान पण मूर्ती महान… डॉक्टरांच्या सन्मानार्थ उभारला २० फूट उंच पुतळा

उत्तर युरोपमध्ये असणाऱ्या लॅटविया देशातील रिगा शहरात एका महिला डॉक्टराचा पुतळा उभा करण्यात आला आहे. येथील लॅटीव्हियन नॅशनल म्युझियम म्हणजेच राष्ट्रीय संग्रहालयाबाहेर हा पुतळा उभा करण्यात आला आहे. अँगारस बिक्सी या शिल्पकाराने हा पुतळा साकारलेला आहे. एक महिला डॉक्टरचा अॅप्रन, गळ्यात थेटस्कोप  आणि हातात ग्लोव्हज घालून हात पसरवून आकाशाकडे पाहत असलेला पूर्णाकृती पुतळा उभारण्यात आला आहे. हे शिल्प बनवण्यासाठी तीन महिन्याचा कालावधी लागल्याने बिक्सी यांनी रॉयटर्सला सांगितलं. रुग्णांना वाचवण्यासाठी डॉक्टर आपले प्राण संकटात टाकत असल्याचे पाहून आपल्याला हे शिल्प साकारण्याची प्रेरणा मिळाली असं शिल्पकाराने सांगितलं.

“बातम्या पाहताना आरोग्य सेवेतील कर्मचाऱ्यांना किती अडचणींना समोरे जावे लागत आहे हे मला जाणवले. इटलीमध्ये तर काही डॉक्टरांना थेट जमीनीवर झोपावे लागल्याचे वृत्तही मी पाहिले. मास्क घालून डॉक्टरांच्या चेहऱ्यावर झालेल्या जखमा मी पाहिल्या. हे सर्व पाहून मुर्तीकार म्हणून मी व्यक्त झालं पाहिजे असं माला वाटलं आणि मी हे शिल्प साकारलं,” असं बिक्सी म्हणाले.

लॅटविया सरकारच्या या निर्णयाचं सोशल मिडियावरुन चांगलं कौतुक होताना दिसत आहे.