Indian Railways to give this stray dog a security job : अनेक प्रकारचे प्राणी आहेत जे माणसांपेक्षा खूप चांगल्या प्रकारे वागतात. कधी कधी हे प्राणी माणसांना कसे वागले पाहिजे ते शिकवतात. अशा घटनांचे अनेक व्हिडीओ सोशल मीडियावरही व्हायरल होत असतात. नुकताच एका श्वानाचा व्हिडीओ व्हायरल होत आहे. हा व्हिडीओ पाहताना तुम्हाला वाटेल की, हा श्वान प्रवाशांच्या सुरक्षेची खूप काळजी घेतोय, पण असे नाही. श्वान चालत्या रेल्वेच्या दरवाज्यावर बसलेल्या लोकांवर झडप घालतोय, त्यामुळे प्रवासी आपले पाय मागे घेत आहेत. हा व्हिडीओ पाहिल्यानंतर अनेकांनी या श्वानास रेल्वेत नोकरी द्यावी, अशी प्रतिक्रिया सोशल मीडियावर व्यक्त केली आहे.
रेल्वे प्रवासादरम्यान अनेक प्रवासी फूटबोर्डवर बसून प्रवास करतात. पोलिसांनी कितीही वेळा इशारा दिला तरी प्रवासी गाफील राहतात. अशा बेफिकीर लोकांमुळे अनेकदा अपघाताच्या घटना घडतात. अशाप्रकारे फूटबोर्डवरून प्रवास करणाऱ्यांना या श्वानाने योग्य धडा शिकवल्याचे दिसत आहे. व्हिडीओनुसार, ट्रेन रेल्वे प्लॅटफॉर्मवर येताच श्वान फूटबोर्डवर बसलेल्या किंवा उभे असलेल्या लोकांना चावा घेण्यासाठी धाव घेतो. श्वान जसा प्रवाशांना चावा घेण्यासाठी धावतो, तसे फूटबोर्डवर बसलेले तरुण सावध होऊन पाय मागे घेतात.
श्वानाच्या या कृत्याचा व्हिडीओ सोशल मीडियावर तुफान व्हायरल होत आहे. अनेक युजर्स वेगवेगळ्या पद्धतीने या व्हिडीओवर प्रतिक्रिया देत आहेत. एका युजरने लिहिले की, या कुत्र्याला पाहून तुम्ही काहीतरी शिकले पाहिजे. तर दुसऱ्या युजरने लिहिले की, याला रेल्वे सुरक्षेत नोकरी दिली पाहिजे. या व्हिडीओवर युजर्स अशाप्रकारे वेगवेगळ्या प्रतिक्रिया देत आहेत.
