Misuse Of Ambulance Siran Video Viral : हैदराबादमधून एक धक्कादायक बातमी समोर आली आहे. रुग्णांना उपचारासाठी वेळेत रुग्णालयात दाखल करता यावं, यासाठी रुग्णवाहिकेच्या सायरनचा वापर करून प्रवास केला जातो. मात्र, रुग्णवाहिकेच्या चालकाने नाश्ता करण्यासाठी जायचं असल्याने ट्रॅफिकमध्ये रुग्णवाहिकेचा सायरन वाजवला आणि रस्त्याच्या बाजूला नाश्ता करण्यासाठी एका हॉटेलमध्ये थांबला. हा धक्कादायक प्रकार पोलिसांना कळताच पोलिसांनी त्या वाहनचालकावर दंडात्मक कारवाई केली.
एका वरिष्ठ पोलीस अधिकाऱ्याने दिलेली माहिती अशी की, “रुग्णवाहिका बशीरबाग जंक्शन येथून जात असताना ही घटना घडली. चालकाने सायरन वाजवल्याने ट्रॅफिक पोलिसांनी त्या रुग्णवाहिकेला पुढे जाण्यासाठी मार्ग काढून दिला. वाहतूक पोलिसांना वाटलं की ही एक एमरजन्सी आहे. परंतु, त्यांनी पाहिलं की, रुग्णवाहिका ट्रॅफिक सिग्नलपासून जवळपास १०० मीटर अंतरावर एका हॉटेलजवळ पार्क करण्यात आलीय. त्यानंतर पोलिसांनी चालकाची चौकशी करताना त्याचा व्हिडीओ कॅमेरात कैद झाला.” चालकाचा हा व्हिडीओ आयपीएस अधिकारी अंजनी कुमार यांनी ट्वीटरवर शेअर केला आहे.
नक्की वाचा – Tiger Video : नांगरणी करत असताना शेतकऱ्यासमोर आला खतरनाक वाघ अन् शेतात घडलं…
इथे पाहा व्हिडीओ
पोलीस उपायुक्त राहुल हेगडे यांनी पीटीआयशी बोलताना म्हटलं की, “ही एक आपात्कालीन परिस्थिती नव्हती. रुग्णवाहिकेच्या चालकाने सायरनचा गैरवापर केला नाही पाहिजे. जर ही एक आपात्कालीन परिस्थिती होती, तर त्याला रुग्णालयात जायला पाहिजे होतं. त्याने तसं केलं नाही आणि रस्त्याच्या बाजूला नाश्ता करण्यासाठी थांबला. याच कारणासाठी त्याने सायरन वाजवला. आम्ही रुग्णालय प्रशासनालाही सूचना देणार आहोत की, अशा प्रकारे वारंवार नियमांचं उल्लंघन होत असेल, तर त्यांच्याविरोधात कायदेशीर कारवाई केली जाईल.”
