Husband Wife Emotional Video: आयुष्यात आपल्या मनासारखा योग्य जोडीदार मिळणं म्हणजे नशीबच समजायचं. आपल्या सुख-दुःखात नेहमी साथ देणारा जोडीदार असला की, सगळ्या संकटांना सामोरं जायला बळ मिळतं. आपल्या आवडीच्या माणसाचा क्षणभर जरी सहवास लाभला तरी तो हवाहवासा वाटतो. या नात्यात फक्त प्रेम आणि प्रेमाची अपेक्षा असते. त्यात दोन्ही बाजूंनी प्रेम जर समान असेल, तर आयुष्यभराचा प्रवास सुखकर होतो.
प्रत्येक नातं जपायला थोडी अधिक मेहनत घ्यावीच लागते. लहानसहान गोष्टीनं आपल्या त्या नात्याला फुलवणं गरजेचे असतं. या नात्यात नवरा-बायकोचं नातं खूप पवित्र मानलं जातं. एकमेकांबद्दल प्रेम, तितकाच आदर आणि विश्वास असणारं नात हे असतं. आपल्या वाईट परिस्थितीतही आपला नवरा तितकीच साथ देतोय, आपल्याबरोबर तो खंबीरपणे उभा राहतोय याचं समाधान बायकोला असतं. प्रत्येकालाच हे जमत नाही; पण ज्यांना जमतं त्यांचा संसार नक्कीच सुखाचा होतो.
सोशल मीडियावर नवरा-बायकोचे अनेक व्हिडीओ व्हायरल होत असतात. सध्या असाच एक व्हिडीओ सोशल मीडियावर व्हायरल होतोय, ज्यात वाईट प्रसंगातही नवरा बायकोसाठी जमेल ते करण्याचं प्रयत्न करतोय.
नवरा असावा तर असा… (Emotional Video)
नवरा बायकोचा हा व्हायरल झालेला व्हिडीओ पाहून तुमच्याही डोळ्यांत पाणी आल्यावाचून राहणार नाही. व्हायरल व्हिडीओमध्ये आपण पाहू शकतो की, एक महिला खूप आजारी असल्यानं रुग्णालयात बेडवर निपचित पडून आहे. तिचा नवरा या कठीण प्रसंगात तिला साथ देतोय. तिला काहीच करायला जमत नसल्यामुळे नवरा तिला स्वत:च्या हातानं जेवण भरवताना दिसतोय. अगदी हसत तिचा मूड चांगला व्हावा यासाठी नवरा अथक प्रयत्न करताना दिसतोय. हा व्हिडीओ नेमका कुठला आहे हे अद्याप कळू शकले नसले तरी अनेकांनी या व्हिडीओत बायकोच्या वाईट प्रसंगात तिच्या बाजूनं ठामपणे उभं राहण्यासाठी नवऱ्याचं कौतुक केलं आहे.
सोशल मीडियावर व्हायरल झालेला व्हिडीओ @phakt_tu_aani_mi या इन्स्टाग्राम अकाउंटवरून शेअर करण्यात आला असून ‘आयुष्याचा जो़डीदार देखणा असण्यापेक्षा जबाबदारी स्वीकारणारा असावा’ अशी कॅप्शन देण्यात आली आहे. व्हिडीओ व्हायरल होताच त्याला तब्बल ५५ लाखांपेक्षा जास्त व्ह्युज आले आहेत.
युजर्सच्या प्रतिक्रिया
सोशल मीडियावर व्हिडीओ व्हायरल होताच अनेकांनी यावर आपल्या प्रतिक्रिया दिल्या आहेत. एका युजरने कमेंट करत लिहिलं, “अगदी खरंय” तर दुसऱ्याने “कठीण प्रसंगात साथ देणाराच खरा जोडीदार असतो” अशी कमेंट केली. तर एक जण कमेंट करीत म्हणाला, “म्हणून जोडीदार विचार करून निवडावा”.