कुटुंब रंगलंय चित्रात! वडील, मुलगा आणि मुलीची प्रेरणादायी कहाणी

अकबर शेख यांनी वयाच्या १५ व्या वर्षांपासून चित्र काढण्यास सुरुवात केली. आज वयाच्या ६६ वर्षानंतरही त्यांच्यात पूर्वीसारखाच उत्साह आहे. सुरुवातीच्या काळात त्यांनी सरकारी नोकरीसाठी प्रयत्न केले. पण कमी शिक्षण असल्यामुळे त्यांना यश मिळाले नाही. त्यानंतर एका नामवंत कंपनीत त्यांनी ६ रुपये ५० पैसे या रोजंदारीवर दोन वर्षे नोकरी केली. त्यानंतर त्यांनी ब्रश आणि कलरचा डबा हाती घेतला. शाळेतील भिंतीवरील चित्रे, ट्रकचे पेंटिंग करणं, गणपती उत्सवात लाकडी प्लायवूडवर निसर्ग चित्र काढण्यास सुरुवात केली. १९७० च्या दशकात १०० रुपये मानधन घेऊन ते गणेशोत्सव मंडळांच्या देखाव्यात रंग भरायचे. अनेक शाळेत त्यांनी रवींद्रनाथ टागोर, छत्रपती शिवाजी महाराज, संत तुकाराम महाराज यांची हुबेहूब चित्र साकारली आहेत. ही चित्रे डिजिटल युगातील फलकांना लाजवतील अशीच आहेत.