युद्धात आणि प्रेमात सर्वकाही माफ असतं, असं म्हटलं जातं. शिवाय प्रेमात पडलेली व्यक्ती आपल्या जोडीदाराला पाहण्यासाठी त्याला भेटण्यासाठी काहीही करायला तयार असते. सध्या बिहारमधील अशीच एक घटना उघडकीस आली आहे, ज्यामध्ये प्रियकराला भेटण्यासाठी एका प्रेयसीने असं काही केलं आहे, जे समजल्यावर तुम्हीदेखील थक्क व्हाल. हो कारण घटनेतील तरुणीने आपल्या प्रियकराला भेटण्यासाठी संपूर्ण गावाला अंधारात टाकल्याची धक्कादायक घटना समोर आली आहे. मिळालेल्या माहितीनुसार, प्रेयसी तिच्या प्रियकराला ज्या ट्रान्सफॉर्मरद्वारे गावात वीजपुरवठा केला जातो, त्याच ट्रान्सफॉर्मरची वीज कट करायला सांगायची. ज्यामुळे संपूर्ण गावातील लाईट जायची आणि मग हे दोघे अंधारात एकमेकांना भेटायचे. गावातील वीजपुरवठा खंडित होत असल्याने गावात चोरीच्या घटनाही घडू लागल्या होत्या. त्यामुळे गावातील लोक सावध झाले आणि असेच एक दिवशी प्रियकर आणि प्रेयसी लाईट बंद करुन एकमेकांना भेटत असताना त्यांना काही लोकांनी पकडलं. यावेळी पाच ते सात लोकांनी मिळून प्रियकराला बेदम मारहाणही केली. यावेळी तरुणीने आपल्या प्रियकराला वाचवण्याचा प्रयत्नदेखील केल्याचं सांगितलं जात आहे. हेही वाचा- VIDEO: टोल भरण्यावरून राडा! ओळखपत्र मागितल्यानं महिलेला भयंकर मारहाण, केस ओढत लाथा बुक्क्यांनी.. गावातील लोकांनी घटनेतील प्रियकराला मारहाण केल्याचा व्हिडिओ सोशल मीडियावर व्हायरल झाला होता. मात्र हा व्हिडीओ व्हायरल होताच संतापलेल्या प्रियकराने आपल्या काही मित्रांना बरोबर घेऊन मारहाण करणाऱ्या गावकऱ्यांच्या घरांची तोडफोड केली. यानंतर गावकऱ्यांनी पोलिसांना या घटनेची माहिती दिली. पोलिसांनी प्रियकरासह त्याच्या मित्रांना पकडून पोलीस स्टेशनमध्ये नेलं. दरम्यान, दोन्ही बाजूच्या लोक पोलीस स्टेशनमध्ये आल्यानंतर तरुणीचे तिच्या प्रियकराशी लग्न लावून देण्याचे मान्य केले. पोलिसांनी दिलेल्या माहितीनुसार, हे प्रकरण प्रेमप्रकरणाशी संबंधित होते. दोन्ही कुटुंबांच्या संमतीने तोडगा निघाला आहे. पण सध्या या प्रेमप्रकरणाची सोशल मीडियावर मात्र जोरदार चर्चा सुरु आहे.
