Viral Video: आजी-आजोबा आणि नातवंडं यांच्यातील उबदार नातं अगदी जगावेगळं आहे. आजी-आजोबांपासून ते नातवंडांपर्यंत हे तीन पिढ्यांचं घट्ट बंधन घर टिकवून असतं. आज धावपळीच्या जीवनात आई-बाबा कामाला जातात तेव्हा या नातवंडांना सांभाळायची जबाबदारी ही आजी-आजोबांवरच असते. आजी-आजोबा त्यांच्या मुलांना, घराला व स्वतःच्या नात्यालाही जपताना दिसतात हे पाहून प्रत्येकाला नवल वाटतं आणि तुमची पिढीच बेस्ट आहे, असं अनेकदा प्रत्येकाच्या तोंडून निघतं. आज सोशल मीडियावर असाच एक व्हिडीओ व्हायरल होत आहे; ज्यात आजी-आजोबांची प्रेमकहाणी एका नातवानं सांगितली आहे, जे पाहून तुम्ही नक्कीच भावूक व्हाल.
व्हिडीओची सुरुवात अनिशच्या आजी-आजोबांची प्रेमकहाणी सांगताना होते; ज्यांच्या लग्नाला ६० वर्षं झाली आहेत. अनिशच्या म्हणण्यानुसार- हे जोडपं नेहमीच त्यांच्या लग्नाचा वाढदिवस मोठ्या थाटात साजरा करतं. मात्र, या वर्षी आरोग्याच्या समस्येमुळे आजीला रुग्णालयात दाखल करण्यात आले होते. तसेच दोघेही लांब असूनही लग्नाच्या वाढदिवसानिमित्त दोघांनाही एकमेकांना भेटवस्तूची देवाणघेवाण करायची होती. आजी-आजोबांनी एकमेकांना काय भेटवस्तू दिली हे तुम्हीसुद्धा व्हिडीओतून पाहा.
हेही वाचा…दिल तो बच्चा है जी! ओपन जिममध्ये नागालँडचे मंत्री तेमजेन करतायत व्यायाम; पाहा मजेशीर VIDEO
व्हिडीओ नक्की बघा :
व्हिडीओत तुम्ही पाहिलं असेल की, हॉस्पिटलमध्ये भेटवस्तू अनिशच्या आजीची प्रतिक्रिया अनमोल होती आणि तिने रुग्णालयातील कर्मचारी (नर्स) यांच्याबरोबर केक कापून लग्नाचा वाढदिवस साजरा केला व त्या बदल्यात आजीने आजोबांना पुष्पगुच्छ पाठवला. त्यानंतर ३० दिवसांनी जेव्हा आजी हॉस्पिटलमधून परत घरी येते तेव्हा आजोबा तिला मिठी मारून तिचे स्वागत करतात.
सोशल मीडियावर हा व्हिडीओ @anishbhagatt या इन्स्टाग्राम अकाउंटवरून शेअर करण्यात आला आहे. तसेच व्हिडीओला ‘मी या पिढीत का जन्मलो…, असे दुःख व्यक्त करीत अनिशने कॅप्शन दिली आहे. तसेच आजी-आजोबांची खास प्रेमकहाणी व्हॉइस-ओव्हरद्वारे सांगितली आहे ; जे पाहून तुमच्याही डोळ्यात नक्कीच पाणी येईल.
