Viral Video : सोशल मीडियावर लग्नाचे अनेक व्हिडीओ व्हायरल होत असतात. सध्या लग्नातील एका गुरुजींचा व्हिडीओ सोशल मीडियावर चांगलाच व्हायरल होत आहे. या व्हिडीओमध्ये गुरुजी नवदाम्पत्यांना भन्नाट सूचना देत आहेत. गुरुजींच्या या भन्नाट सूचना ऐकून तुम्हीही पोट धरून हसाल.
व्हायरल झालेला हा व्हिडीओ एका लग्नातील आहे. व्हिडीओमध्ये तुम्हाला दिसेल की, नुकतेच लग्न झालेले नवरा-नवरी एकमेकांसमोर उभे आहेत आणि त्यांच्या पाठीमागे उभे राहून गुरुजी या नवदाम्पत्याला सूचना देत आहेत.
गुरुजी सूचना देताना म्हणतात, “निखिलराव, मुलीचे मामा-मामी, आई-वडील आणि बाकीचे सगळे तु्म्हाला सांगतात की, लहानपणापासून ते आजच्या दिवसापर्यंत या मुलीचा जसा सांभाळ झाला, तिचे जे काही हट्ट पुरविले ते तुम्ही आजपासून पुरवायचे. त्यांनी तिला कधीही कोणत्याही गोष्टीची कमतरता पडू दिली नसावी. त्यामुळे तुम्हीही या मुलीला कोणत्याही गोष्टीची कमतरता भासू द्यायची नाही. साडी मागितली, साडी दे, पिक्चरला घेऊन जा. जसा लक्ष्मीनारायणाचा सुखाने संसार झाला तसा तुम्ही आजपासून सुखाने संसार करायचा. आजपासून संपूर्ण ठाण्यामध्ये रस्त्यावरून चालताना सरळ नाकासमोरून चालायचं. आजूबाजूला कुठे जास्त बघत बसायचं नाही.”
त्यानंतर गुरुजी पुढे म्हणतात, “विनीताबाई, सकाळी ७-८ वाजता घरी कोणी माणूस आला, तर कपाळाला आठ्या पडता कामा नयेत. चहा-नाश्ता बनवून द्यायचा. सासऱ्यांना चहापाणी जे काही लागतं, ते वेळेवर द्यायचं. महिन्याला तुम्ही जे दोघे पैसे कमावताय, ते एक तारखेपर्यंत पुरवायचे. दर महिन्याला नवऱ्याकडे नवीन साडी, आयफोन, असं काहीतरी मागत बसायचं नाही.
“निखिलराव, आजपासून टिकटॉक, फेसबुक, इन्स्टाग्राम, व्हॉट्सअॅप कामापुरतंच वापरायचं. दोघांनी एकमेकांकडे लक्ष ठेवा आणि एकमेकांवर विश्वास ठेवा. “या सूचना दिल्यानंतर गुरुजी मामांना सांगतात की, दोन्ही हात वर करा.
हेही वाचा : Optical Illusion : फोटोत जो शब्द तुम्हाला पहिल्यांदा दिसतो, त्यावरून जाणून घ्या तुमचे व्यक्तिमत्त्व
सध्या हा व्हिडीओ प्रचंड व्हायरल होत आहे. harshaddalviphotography या इन्स्टाग्राम अकाउंटवरून हा व्हिडीओ शेअर करण्यात आला असून व्हिडीओच्या कॅप्शनमध्ये लिहिले आहे, ‘आजकालचे गुरुजी’
या व्हिडीओवर नेटकऱ्यांनी अनेक मजेशीर प्रतिक्रिया दिल्या आहेत. एका युजरने लिहिले आहे, ‘माझ्या लग्नात मला हेच गुरुजी हवे आहेत’ तर एका युजरने लिहिले आहे, ‘मला गुरुजी खूप आवडले. एकदम भारी आहेत.’ आणखी एका युजरने लिहिले आहे, ‘गुरुजींनी खरं काय ते चांगल्या पद्धतीने समजावून सांगितले आहे.’ अन्य काही युजर्सनी गुरुजींचा नंबर मागितला आहे.
