मोरोक्कोमधील चौथ्या क्रमांकाचे मोठे शहर असलेल्या माराकेशला शुक्रवारी रात्री तीव्र भूकंपाचा धक्का बसला. यात दोन हजाराहून अधिक नागरिक ठार झाले असून, अ‍ॅटलास पर्वतराजीतील खेड्यांपासून माराकेशच्या ऐतिहासिक शहरापर्यंत अनेक इमारतींचे नुकसान झाले आहे. या भूकंपादरम्यानचे एक भयनाक सीसीटीव्ही फुटेज सोशल मीडियावर मोठ्या प्रमाणात व्हायरल होत आहेत. जे भुकंपाच्या आधीचा काही सेकंदाचा असल्याचं सांगितलं जातं आहे.
पर्यटनासाठी अतिशय प्रसिद्ध असलेल्या माराकेश शहरात हा मोठा भूकंप झाला आहे. तर या शहरातील एका ठिकाणी लावण्यात आलेल्या सीसीटीव्ही मध्ये भूकंपाआधीचे काही क्षण रेकॉर्ड झाले आहेत. ज्यामध्ये काही लोक जीव वाचवण्यासाठी धावताना दिसत आहेत. व्हिडीओत काही लोक एका ठिकामी बसले असताना अचानक इकडे-तिकडे पळायला सुरुवात करताना व्हिडीओत दिसत आहेत. शिवाय या वेळी अनेक इमारत कोसळल्यामुळे हवेत धूळीचे लोट उडत असल्याचंही दिसत आहे. या शहरात सध्या बचावकार्य सुरू असून ढिगाऱ्याखाली दबलेल्या लोकांचा शोध घेणं सुरू आहे. आतापर्यंत २००० लोकांना मृत घोषित करण्यात आले आहे. तर २०५९ जण जखमी झाले आहेत. त्यापैकी हजारांहून अधिक लोकांची प्रकृती चिंताजनक असल्याची आकडेवारी गृहमंत्रालयाने जाहीर केली आहे.
भूकंपाचा केंद्रबिंदू असलेल्या अल-हॉज प्रांतात १,२९३ लोकांच्या मृत्यूची नोंद झाली आहे. तर तरूदंत प्रांतात ४५२ लोकांचा मृत्यू झाला आहे. हे दोन सर्वाधिक प्रभावित क्षेत्र असून उत्तर आफ्रिकन प्रदेशात हा आतापर्यंतचा सर्वात शक्तिशाली भूकंप असल्याचं सांगितलं जात आहे. १२० वर्षांनंतर एवढा मोठा भूकंप झाल्याचे एका तज्ज्ञाचे म्हणणे आहे. अयूब टुडाइट ने एसोसिएटेड प्रेसला सांगितले की, तो जिममध्ये मित्रांबरोबर व्यायाम करत असताना त्याला मोठा धक्का जाणवला. तो म्हणाला, “आम्ही लोकांना मरताना, पळताना आणि लहान मुलांना रडताना पाहिलं. हे आम्ही यापूर्वी कधीही पाहिले नव्हतं, या परिसरात २० जणांचा मृत्यू झाला असून ३० जण जखमी झाले आहेत.”
