ट्रेनमध्ये गाठला क्रुरतेचा कळस! श्वानाला भरलं पोत्यात अन्… Video पाहून लोकांचा संताप

या धक्कादायक घटनेचा व्हिडीओ Street dogs of Bombay या इन्स्टाग्राम अकाउंटवरून पोस्ट करण्यात आला आहे, जो आता अनेक सोशल मीडियावरून व्हायरल होतोय. या पोस्टच्या कॅप्शनमध्ये लिहिले आहे की, “माणसे किती क्रूर कशी काय झाली आहेत? “इतक्या अकल्पनीय क्रूरतेतून ते कसे काय आनंद शोधू शकतात,” हा हृदयद्रावक व्हिडीओ पाहिल्यानंतर युजर्सदेखील खूप संतापले आहेत.

व्हिडीओत दिसतेय की, ट्रेनमध्ये पोलीस आणि काही लोक उभे आहेत, यातील दोन लोकं पोत्यात भरलेल्या श्वानाची सुटका करतायत. पोतं दोरीने बांधलं होत ते सोडवून ते श्वानाला बाहेर काढतात.

Street dogs of Bombay या संस्थेच्या एका टीम मेंबरने या घटनेविषयी बोलताना सांगितले की, “मला विचार करून थरथर कापायला होतयं – त्याला कचऱ्यासारखे फेकून द्यायचे होते का? माणसांनी प्राण्यांवर केलेल्या क्रूरतेचे शब्दात वर्णन करता येणार नाही. दररोज आपण गैरप्रकार, छळ आणि क्रुरतेच्या भयानक घटना ऐकतो, पण तरीही आपण जगात असे वावरतोय जसे काही घडलेच नाही. आपण कोणत्या प्रकारच्या समाजात राहतोय? अशा कृतींमधून आनंद शोधणाऱ्यांमधील माणुसकी कुठे हरवलीय? अशांना रात्री झोप कशी येते? हा केवळ प्राण्यांविरुद्धचा गुन्हा नाही; हे मानवतेवरचं एक कलंक आहे. या विरोधात तुम्ही आवाज उठवा. कारवाईची मागणी करा. मुक्या प्राण्यांचे रक्षण करा. आम्ही या घटनांकडे दुर्लक्ष करू शकत नाही.”

सोशल मीडियावर अनेक लोकदेखील या क्रूर आणि हृदयद्रावक घटनेविषयी संताप व्यक्त करतायत, तर अनेक जण श्वानाला जीवदान दिल्याबद्दल त्या माणसाचे आभार मानत आहेत. दरम्यान, अनेकांनी या क्रूर घटनेस दोषी असलेल्या आरोपींना तात्काळ अटक करत त्यांना कडक शिक्षा करा अशी मागणी केली आहे.