IAF Communal Post Hindu- Sikh: भारतीय हवाई दल (IAF) ने सोशल मीडियावर तुफान व्हायरल होत असलेल्या एका दाव्यावर स्पष्टपणे उत्तर देत सोशल मीडिया प्लॅटफॉर्म X (पूर्वीचे ट्विटर) वर पोस्ट शेअर केली आहे. व्हायरल होणाऱ्या दाव्यानुसार, भारतीय हवाई दलातील शीख वैमानिक आणि कर्मचारी त्यांच्या हिंदू वरिष्ठांकडून सतत अपमानास्पद वागणूक मिळाल्यामुळे त्यांची कर्तव्ये पार पाडण्यास नकार देत आहेत. असे सांगणारी एक पोस्ट सध्या चर्चेत होती.
काय होत आहे व्हायरल?
एका सोशल मीडिया वापरकर्त्याने भारतीय हवाई दलातून माहिती मिळाल्याचा दावा करत, असा आरोप केला की, बहुसंख्य शीख वैमानिक आणि कर्मचारी त्यांच्या हिंदू वरिष्ठांकडून होणाऱ्या नियमित अपमानामुळे आपले काम करण्यासाठी नकार देत आहेत. हा दावा अनेक सोशल मीडिया वापरकर्त्यांनी शेअर केला होता. प्रचंड व्हायरल झाल्यावर अनेकांनी यावर कमेंट करत भारतीय हवाई दलात सेवा करणाऱ्या शीख अधिकाऱ्यांच्या व काहींनी हिंदू अधिकाऱ्यांवर सुद्धा टीका केली होती. या प्रकरणाला जातीय वळण मिळत असताना अखेरीस भारतीय हवाई दलाकडून अधिकृत स्पष्टीकरण देण्यात आले.
भारतीय हवाई दलाने एका अधिकृत निवेदनात, या पोस्टचा उल्लेख करत स्पष्टीकरण दिले आहे. “सदर व्हायरल पोस्टमधील माहिती खरी नाही आणि अफवा पसरवण्यासाठी पोस्ट करण्यात आली आहे. #IndianAirForce.” भारतीय वायुसेनेच्या ऑफिशियल X खात्याने एक फोटो देखील शेअर केला आहे.
लक्षात घ्या, यापूर्वी सुद्धा भारतीय हवाई दल आणि भारतीय सैन्याच्या इतर शाखांना अनेकदा अशा प्रकारच्या खोट्या बातम्या पसरवून संघटनांनी लक्ष्य केले आहे. विशेष म्हणजे, भारताशी शत्रुत्व राखणारे देश भारतीय सैन्यात फूट आणि संघर्ष निर्माण करण्यासाठी खोट्या कथनांचा प्रचार करतात असेही दिसून आले आहे. त्यामुळे असे दावे परस्पर शेअर करण्याऐवजी अधिकृत पडताळणी करून घेणे अत्यंत आवश्यक आहे.
