VIDEO : मराठमोळ्या चित्रकाराची ‘3D Painting’ किमया !

रंग, रेषा आणि चित्रकाराची कल्पना यांच्या सुंदर मिलाफातून तयार होते ते चित्र. ही चित्रं जरी सजीव नसली तरी कलाकाराच्या भावना ठामपणे बघणा-यांसमोर मांडण्याचा जीवंतपणा त्यांच्यात नक्कीच असतो. काही कलाकारांच्या कलाकृती पाहताना हा नक्की कलाकार आहे की समोर दिसणा-या गोष्टीला अगदी वितभर कागदावर उतरवणारा किमयागार असा संभ्रम बघणा-याला पडल्याशिवाय राहत नाही. त्याचीही चित्र तशीच काहीशी आहे. तो अशी चित्र काढतो की पाहणा-याला  हे फक्त चित्र आहे हे सांगून खरे वाटणार नाही. फेसबुक ट्विटरसारख्या सोशल मीडियावर लाखो फॉलोअर असणारा हा कोणी परदेशी चित्रकार नाही… तर हा आहे मराठमोळा मुंबईकर तरुण सुशांत सुशील राणे. सुशांत केवळ २० वर्षांचा असून, त्याच्या कलेने प्रत्येकालाच वेड लावले आहे. ‘३डी चित्र’ काढण्यात सुशांतचा हातखंडा आहे. त्याच्या ३डी आर्टने फेसबुक आणि इन्स्टाग्रामवरील त्याच्या चाहात्यांना भुरळ घातली आहे. दिवसेंदिवस त्याच्या चाहत्यांच्या संख्येत वाढ होत आहे. त्याने काढलेले ‘३डी पेंटींग’ हे खरोखरची वस्तू नसून आपण एक पेंटींग पाहात आहोत यावर बघणाऱ्याचा प्रथम विश्वासच बसत नाही.

चित्रकलेचे कोणतेही औपचारिक शिक्षण सुशांतने घेतलेले नाही.  त्याने रेखाटलेले बल्बचे चित्र असो किंवा स्टीलच्या चमच्याचे, चेपून ठेवलेल्या कोका-कोला कॅनचे असो की काचेच्या ग्लासचे… ही चित्रं इतकी हूबेहूब वाटतात, खरी वाटतात की या वस्तू ख-या नसून फक्त पेन्सिल रंग आणि सुशांतच्या हाताची कमाल आहे यावर विश्वास ठेवणे अनेकांना अवघड जाईल. १६ वर्षांचा असल्यापासून सुशांत नवनवे प्रयोग करत आहे. हॉलीवूडमधल्या  अनेक कलाकारांची व्यक्तिचित्रदेखील त्याने रेखाटली आहेत. त्याच्या कलेची दखल ऑस्ट्रेलियातल्या एका बड्या वृत्तपत्राने देखील घेतली. फेसबुकवरही सुशांतचे हजारो फॉलोअर्स आहेत. सोशल मीडियामुळे त्याला आपली कला दाखवण्यासाठी ख-या अर्थाने ग्लोबल व्यासपीठ मिळाले. बॉलीवूड कलाकार रितेश देशमुखने देखील सुशांतच्या कलेची दखल घेतली होती.

View this post on Instagram

A post shared by Sushant S Rane (@sushantsrane.1)