‘इंडिया शायनिंग’! देशातील #MeToo मोहिमेमुळे जगभरात भारताची ‘छी थू’

गुगलने  जगभरात Me Too हे दोन शब्द कसे सर्च होतात याबद्दलची माहिती मांडण्यासाठी ‘मी टू रेझिंग’ ही सुविधा वेबसाईटच्या माध्यमातून सुरु केली आहे. एप्रिल महिना हा लैंगिक अत्याचार जागृती महिना म्हणून जगभरामध्ये साजरा केला जातो. त्यानिमित्तानेच गुगलने थ्री डी व्हिज्युअलायझेशनच्या मदतीने जगभरातील #MeToo सर्च ट्रेण्डस मॅपवरच मांडले आहेत. भारतामध्ये मागील तीन आठवड्यांहून अधिक काळापासून सुरु झालेल्या #MeTooIndia या मोहिमेमुळे या नकाशामध्ये भारतही चमकू लागला आहे. म्हणजेच लैंगिक अत्याचारासारख्या वाईट गोष्टींसंदर्भात जगभरात भारताचे नाव झळक आहे. एका अर्थाने नकोशा गोष्टीसाठी ‘इंडिया शायनिंग’ होत असल्याचे दिसत आहे.

मागील महिन्याच्या उत्तारार्धात हिंदी सिनेमातील अभिनेत्री तनुश्री दत्ताने अभिनेते नाना पाटेकर यांच्यावर लैंगिक शोषणाचे आरोप केले. त्यानंतर या मोहिमेला भारतात जोर मिळाला. हॉर्न ओके प्लिज सिनेमाच्या सेटवर आपल्याबरोबर नाना पाटेकरांनी गैरवर्तवणूक केल्याचा आरोप तनुश्रीने केल्यानंतर एकच खळबळ उडाली. आणि त्यानंतर सिने श्रेत्रातील अनेक महिलांनी त्यांच्यावर झालेल्या अत्याचाराबद्दलची माहिती सोशल मिडियाच्या माध्यमातून दिली.

गुगलने उपलब्ध करुन दिलेल्या या नवीन सोयीमध्ये ‘Me Too’ हे शब्द कोणत्या देशातील लोक सर्वाधिक सर्च करत आहेत याची माहिती लाइव्ह मिळते. म्हणजेच दिलेल्या क्षणी सर्वाधिक ‘Me Too’ संदर्भातील सर्च देणारी जागा नकाशात जास्त प्रकाशित दिसते. त्या जागेच्या नावावर क्लिक केल्यावर त्या दिवशी हा विषय संबंधित जागेच्या संदर्भात सर्वाधिक का चर्चेत राहिला याबद्दलच्या बातम्यांच्या लिंक गुगलकडून उपलब्ध करुन दिल्या जातात. उदाहणार्थ मुंबई शहरावर क्लिक केल्यावर तुम्हाला मुंबईमध्ये ‘Me Too’ त्या दिवशी कायकाय घडामोडी घडल्या याच्या बातम्या मिळतील.

केवळ बातम्या देण्यासाठीच किंवा कुठून कोण #MeToo हॅशटॅग सर्च होतोय यासाठीच ही सोय उपलब्ध करुन देण्यात आली आहे असे नाही. या वेबासईटवर महिलांसाठी काही महत्वाच्या लिंक देण्यात आल्या आहेत. जसे लैंगिक अत्याचार झाल्यास यासंदर्भातील तक्रार करण्यासाठी तुम्हाला कुठे मदत मिळू शकते याबद्दलची माहिती sexual assault resources या बटणवर क्लिक केल्यावर मिळते. तसेच कुठे लैंगिक अत्याचार झाल्याची माहिती तुमच्याकडे असेल तर त्यासंदर्भात तुम्ही तक्रार करण्यासाठी या साईटचा वापर करु शकता.

एप्रिल महिन्यामध्ये ही वेबसाईट सुरु करण्यात आली त्यावेळी बोलताना गुगलच्या सार्वजनिक धोरण आणि सरकारी संबंधांबद्दलच्या वरिष्ठ सल्लागार असणाऱ्या मलिका सार यांनी या वेबसाईटच्या निर्मितीमागील संकल्पनेची माहिती दिली होती. #MeToo मोहिमेमुळे जगभरामध्ये लैंगिक अत्याचारांसंदर्भात जनजागृती होत आहे. ही मोहिम म्हणजे इंटरनेटच्या इतिहासातील एक महत्वाची मोहिम आहे. या #MeToo मोहिमेच्या माध्यमातून लैंगिक अत्याचार झालेल्या महिलांनी इंटरनेटचा वापर करुन आपल्यावर झालेल्या अत्याचारांना वाचा फोडली आहे. या मोहिमेबद्दल आपण सर्वचजण लैंगिक अत्याचारांबद्दल जागृक झालो आहोत. एक-एक करुन अनेक महिला यासंदर्भात बोलतील तेव्हा जग केवळ लैंगिक अत्याचाराच्या समस्यकडे पाहणार नाही तर त्यावर उत्तर शोधण्याचाही प्रयत्न केला जाईल असा विश्वास सार यांनी व्यक्त केला.

गुगलची ही संकल्पना अनेकांना आवडली असून इतक्या महत्वाच्या मोहिममध्ये अशा आगळ्यावेगळ्या पद्धतीने सहभाग नोंदवल्याबद्दल अनेकांनी गुगलचे कौतूक केले आहे. यापुढेही वेगवेगळ्या प्रकारे तंत्रज्ञानाच्या मदतीने महिलांच्या समस्यांना वाचा फोडण्याचे काम गुगुलने करावे असेही नेटकऱ्यांचे म्हणणे आहे.