भारत आणि पाकिस्तान या पारंपारिक प्रतिस्पर्धींचा सामना कायम ‘हाय व्होल्टेज’ असतो. दोन्ही देशाचे खेळाडूही ‘करा किंवा मरा’ या पद्धतीने खेळतात. सामना जिंकण्यासाठी ते काहीही करताना दिसतात. पाकचे शाहिद आफ्रिदी, आमिर सोहेल, जावेद मियाँदाद, वासिम अक्रम, वकार युनूस आणि टीम इंडियाचे किरण मोरे, नवज्योतसिंग सिद्धू, वेंकटेश प्रसाद, सौरव गांगुली, गौतम गंभीर या खेळाडुंनी मैदानावर परस्परांना दिलेली खुन्नस आठवा. अनेकवेळा असे क्षण घडले की, मैदानावरच हे खेळाडू हातघाईवर उतरल्याचे दिसले. पंचांनी व इतर खेळाडुंनी रोखल्यामुळे पुढील अनर्थ टळला. त्यामुळेच मैदानावर व मैदानाबाहेर भारत-पाक सामन्यावेळी प्रचंड तणाव व दबाव असतो. रविवारी एजबस्टन येथे चॅम्पियन्स ट्रॉफीमध्ये झालेल्या सामन्यावेळी मात्र वेगळेच चित्र दिसले. आपल्या तडाखेबाज फलंदाजीने एजबस्टनचे मैदान गाजवणाऱ्या डावखुऱ्या युवराज सिंगने खिलाडीवृत्तीचे दर्शनही घडवले. सोशल मीडियावर त्याच्या याच कृतीचे मोठे कौतुक होताना दिसत आहे. या सामन्यात मॅन ऑफ द मॅचचा मानकरी ठरलेला युवी कसा ‘जंटलमन’ आहे, हे सांगताना त्याच्या चाहत्यांना शब्दही अपुरे पडत आहेत.
प्रथम फलंदाजी करताना सलामीची जोडी पॅव्हेलियनमध्ये परतल्यानंतर कर्णधार विराट कोहली व युवराज सिंग यांनी काही क्षणातच संपूर्ण खेळाची सूत्रे आपल्या हाती घेतली. युवी तर पाक गोलंदाजांच्या पार चिंधड्याच उडवत होता. त्याने एकाही गोलंदाजाला सोडले नाही. सामन्यातील ४६ वे षटक टाकण्यासाठी पाकचा डावखुरा वेगवान गोलंदाज वहाब रियाज आला. युवराजने त्याच्या या षटकातही भरपूर धावा काढल्या. षटकादरम्यानच वहाब रियाज गोलंदाजी करताना अचानक उजवा घोटा दुखावल्यामुळे खाली पडला व वेदनेने तो व्याकूळ झाला. तो लगेचच आपल्या पायातील बूट काढून घोटा न्याहाळू लागला. त्याचवेळी स्ट्राइकवर असलेला युवराज त्याच्याजवळ गेला आणि त्याच्या खांद्यावर हात ठेवत त्याला दिलासा देण्याचा प्रयत्न केला. वहाब रियाज पुढे गोलंदाजी करू शकला नाही पण युवराजने या कृतीने मात्र सर्वांची मने जिंकली.
— Ashok Dinda (@lKR1088) June 4, 2017
दरम्यान, हा सामना टीम इंडियाने एकहाती जिंकला. रोहित शर्मा, शिखर धवन, युवराज सिंग, विराट कोहली आणि हार्दिक पांड्या यांच्या फलंदाजीने प्रथम धावांचा डोंगर उभारण्यात आला. त्यानंतर भारतीय गोलंदाजांनीही अप्रतिम गोलंदाजीचे प्रदर्शन करत टीम इंडियाला १२४ धावांनी दणदणीत विजय मिळवून दिला. विशेष म्हणजे पावसाने या सामन्यात अनेकवेळा व्यत्यय आणला होता.
