VIDEO : दारुपुढे माणुसकी हारली! अपघातग्रस्त कारमधील ड्रायव्हरला वाचवण्याऐवजी लोकांनी पळवल्या दारुच्या बाटल्या

सोशल मीडियावर बिहारमधील गया येथे दारूने भरलेल्या कारचा अपघात झाल्याचा व्हिडीओ समोर आला आहे. अपघातानंतर कारमध्ये दारू असल्याचं समजताच लोकांनी मदत करायची सोडून थेट कारमधील बाटल्या पळवून न्यायला सुरूवात केल्याचंही दिसत आहे. यावेळी अपघातामध्ये ड्रायव्हरला काही दुखापत झालेय का? तो किती जखमी झालाय? याची कोणी साधी चौकशीही केली नसल्याचं व्हिडिओत पाहायला मिळत आहे.

हेही पाहा- संतापजनक! अंथरुणाला खिळलेल्या सासऱ्यांसोबत सुनेचं अमानुष कृत्य; चादर पेटवली, शिवीगाळ केली अन्…VIDEO व्हायरल

व्हायरल व्हिडिओमध्ये रस्त्याच्या मधोमध एका कारचा अपघात झाल्याचं दिसत आहे. अपघात झालेल्या कारमधील दारुच्या बाटल्या घेऊन लोक सैरावैरा पळत आहेत. यावेळी त्याच रस्त्यावरुन अनेक वाहने जाताना दिसत आहेत. मात्र कोणालाही त्याची भीती वाटत नसून लोक फक्त दारूच्या बाटल्या पळवण्यात मग्न असल्याचं पाहायला मिळत आहे.

सोशल मीडियावर व्हायरल होत असलेल्या या व्हिडिओवर लोक वेगवेगळ्या प्रकारच्या प्रतिक्रिया देत आहेत. एका युजरने लिहिलं, “दारुच्या बाटल्यांपुढे कोणालाही कायद्याची भीती आणि जीवाची पर्वादेखील नाही.” दुसऱ्या एकाने लिहिलं, “हे सिद्ध झालं की, दारूबंदीमुळे लोक दारू पिणे बंद करत नाहीत, उलट अनेकदा ते विषारी दारू पितात, जे अधिक धोकादायक आहे.” तर आणखी एकाने लिहिलं, “या लोकांना जीवापेक्षाही दारू महत्त्वाची आहे, शेजारुन भरधाव वेगाने जाणाऱ्या वाहनांचीही त्यांना भिती वाटत नाहीये, ते फक्त दारु पळवण्यात व्यस्त आहेत.”