Hardik Pandya Krunal Pandya was seen singing bhajans : आयपीएलमधील मुंबई इंडियन्सचा कर्णधार हार्दिक पांड्या आणि लखनऊ सुपर जायंट्सचा अष्टपैलू खेळाडू असलेला त्याचा भाऊ कृणाल पांड्या सध्या चांगलेच चर्चेत आहेत. पण, या चर्चेमागचे कारण क्रिकेट नसून दुसरेच आहे. सोशल मीडियावर सध्या पांड्या ब्रदर्सचा एक व्हिडीओ तुफान व्हायरल होतोय. या व्हिडीओत दोघे भाऊ भक्तिभावाने चक्क भजन गाताना दिसतायत. त्यांचा हा व्हिडीओ पाहून युजर्सही भन्नाट कमेंट्स करीत आहेत.
हा व्हिडीओ पांड्या ब्रदर्सच्या घरातील आहे. हार्दिक पांड्या आणि कृणाल पांड्या यांच्या घरी एका पूजेचे आयोजन करण्यात आले होते. त्यानिमित्ताने त्यांचे सर्व नातेवाईक उपस्थित होते. यावेळी एका भजनाच्या कार्यक्रमाचे आयोजन करण्यात आले होते. व्हिडीओत तुम्ही पाहू शकता की, आधी हार्दिक पांड्या एकटा भजन गात नाचताना दिसतोय. त्यानंतर काही वेळाने त्याचा भाऊ कृणाल पांड्याही त्याच्याबरोबर आला आणि दोघेही अगदी आनंदात ‘हरे कृष्ण हरे राम’ असे गाताना दिसत आहेत. यावेळी दोघांनीही अगदी पारंपरिक कुर्ता-पायजमा घातलेला दिसत आहे.
पाहा पांड्या ब्रदर्सनी शेअर केलेला व्हिडीओ
या व्हिडीओवर आता युजर्सही चांगल्या कमेंट्स करताना दिसत आहेत. एका युजरने लिहिले की, भावा तुझ्याबद्दलचा आदर वाढला आहे. ही देवाची शक्ती आहे. दुसऱ्या युजरने लिहिले की, पांड्या बंधूंचा आदर! तिसऱ्या युजरने म्हटले की, तुला असे पाहून मला आनंद झाला. तुम्ही प्लीज नेहमी असेच आनंदी राहा. अशा प्रकारे चाहते पांड्या ब्रदर्सवर प्रेमाचा वर्षाव करीत आहेत.
दरम्यान, काही दिवसांपूर्वीच हार्दिक पांड्या गुजरातमधील सोमनाथ मंदिरात दर्शनासाठी गेला होता. त्यावेळी हार्दिक पांड्याचा सोमनाथ मंदिरात पूजा करतानाचा व्हिडीओ आणि फोटो सोशल मीडियावर व्हायरल झाले होते. त्यानंतर आता हा दुसरा व्हिडीओ व्हायरल होत आहे; ज्यामध्ये हार्दिक भजन गाताना दिसत आहे. हार्दिक पांड्याचा सोमनाथ मंदिरात पूजा करतानाचा व्हिडीओ श्री सोमनाथ मंदिराने आपल्या अधिकृत ट्विटर हॅण्डलवरून शेअर केला आहे.
