Chardham Yatra 2024 : उत्तराखंडमधील प्रसिद्ध केदारनाथ धामचे दरवाजे आज भाविकांसाठी उघडण्यात आले आहेत. आज सकाळी ७ वाजता विधीपूर्वक पूजा करून हे दरवाजे उघडले असून दर्शनाला सुरुवात झाली आहे. हा क्षण हजारो भाविकांना याची डोळा पाहण्याचे भाग्य मिळाले. यावेळी आलेल्या भाविकांमध्ये उत्साह आणि श्रद्धेचे वातावरण पाहायला मिळाले. बाबांचा जयघोष करत भक्त डोंगरावर चढले आणि दरवाजे उघडताच भक्तांचा सर्व थकवा नाहीसा झाला. त्यानंतर बाबा केदार यांच्या जयघोषाने परिसर दुमदुमून गेला. यावेळी हेलिकॉप्टरमधून पुष्पवृष्टी करण्यात आली.
दरवाजे उघडण्याच्या पहिल्या दिवशी पहाटेपासून ते सायंकाळी ५ वाजेपर्यंत भाविकांना अखंड दर्शन घेता येईल. कोणत्याही व्यत्ययाशिवाय भाविकांना सतत दर्शन घेता येईल. केदारनाथ मंदिराचे दरवाजे उघडण्याच्या निमित्ताने राज्याचे मुख्यमंत्री पुष्कर सिंह धामी पत्नीसह केदारनाथ धाममध्ये पोहोचले. बाबा केदार यांना प्रार्थना करण्यासोबतच त्यांनी चारधाम यात्रेला येणाऱ्या भाविकांना शुभेच्छाही दिल्या. यावेळी बद्री-केदार मंदिर समितीचे अध्यक्ष अजेंद्र अजय हेही उपस्थित होते.
केदारनाथ मंदिराचे दरवाजे उघडण्याचा क्षण १० हजारांहून अधिक भाविकांनी पाहिला. येथे शून्य अंश तापमानातही भाविकांच्या श्रद्धेमध्ये कोणतीही घट दिसून आली नाही. बोल बम, हर हर महादेवच्या जयघोषाने संपूर्ण परिसर दुमदुमत आहे. या उत्सवासाठी मंदिर २४ क्विंटल फुलांनी सजवण्यात आले आहे.
११ मे रोजी केदारनाथ धामचे रक्षण करणाऱ्या भैरवनाथ मंदिराचे दरवाजेही भाविकांसाठी उघडण्यात येणार आहेत. यासोबतच केदारनाथ मंदिरात बाबा केदार यांची आरती आणि भोग व्यवस्थाही सुरू होणार आहे. काल संध्याकाळी उशिरापर्यंत पहिल्या दिवशी बाबा केदार यांच्या दर्शनासाठी १६ हजारांहून अधिक भाविक केदारपुरीत पोहोचले होते. आज सकाळी केदारनाथ धामचे दरवाजे उघडल्यानंतर यमुनोत्री धामचे दरवाजेही भाविकांसाठी सकाळी १०.२९ वाजता उघडण्यात आले आहेत. आता गंगोत्री धामचे दरवाजे १२.२५ वाजता उघडले गेले. १२ मे रोजी सकाळी ६ वाजता बद्रीनाथ धामचे दरवाजे उघडतील.
बम भोलेच्या जयघोषाने देवभूमी दुमदुमली
हिवाळ्यात मुसळधार बर्फवृष्टी आणि कडाक्याच्या थंडीमुळे चार धाम दरवर्षी ऑक्टोबर-नोव्हेंबरमध्ये भाविकांसाठी बंद केले जाते, जे पुढील वर्षी एप्रिल-मेमध्ये पुन्हा उघडले जाते. दर उन्हाळ्यात होणाऱ्या चारधाम यात्रेच्या सुरुवातीची स्थानिक लोकही वाट पाहतात. सहा महिने चालणाऱ्या या प्रवासात देश-विदेशातून येणारे लाखो भाविक आणि पर्यटक हे लोकांसाठी रोजगार आणि उदरनिर्वाहाचे साधन आहे. म्हणूनच चारधाम यात्रा हा गढवाल हिमालयाच्या अर्थव्यवस्थेचा कणा मानला जातो. आज मंदिराचे दरवाजे उघडताच हर हर महादेव आणि बम भोलेच्या जयघोषाने देवभूमी दुमदुमली.
चारधाम यात्रेसाठी नोंदणी कशी करावी? (How to register Kedarnath Yatra 2024?)
१- सर्वप्रथम registrationandtouristcare.uk.gov.in या अधिकृत वेबसाइटवर जा.
२- या पेजच्या वरच्या उजव्या बाजूला, तुम्हाला Register/Login बटण दिसेल. त्यावर क्लिक करा.
३- आता Register for Chardham and Hemkund कॉलममध्ये तुमचा तपशील भरा.
४- नाव, मोबाइल नंबर, ईमेल, राज्य अशी माहिती भरल्यानंतर तुमचा पासवर्ड तयार करा आणि साइन अप करा.
५- यानंतर तुम्हाला तुमच्या फोनवर एक OTP येईल, तो पाहा आणि कॉलममध्ये भरा.
६- यानंतर तुमची नोंदणी पूर्ण होईल.
७- तुमच्या फोनवर एक नोंदणी क्रमांकदेखील पाठवला जाईल, ज्यावरून तुम्ही नोंदणी कार्ड डाउनलोड करू शकता.
८- याशिवाय तुम्ही touristcareuttarakhand ॲप डाउनलोड करूनही तुमची नोंदणी करू शकता.
९- टोल फ्री क्रमांक ०१३५ १३६४ आणि व्हॉट्सॲप क्रमांक ९१-८३९४८३३८३३ द्वारे नोंदणीची सुविधाही देण्यात आली आहे.
