Viral Video: माणसं फार काळ एकट्यानं राहू शकत नाहीत. मन मोकळं करायला, बोलायला कोणीतरी बरोबर असावं, अशी प्रत्येकाची इच्छा असते. त्यासाठी आपण इतरांशी मैत्री करतो किंवा पाळीव अथवा भटक्या प्राण्यांबरोबरही मैत्री करतो. मग हे प्राणी एकदा का जिवलग मित्र झाले की, मग आपल्यातील प्रत्येक सुख-दुःखात आपण त्यांनासुद्धा सहभागी करून घेतो. आज सोशल मीडियावर असाच एक व्हिडीओ व्हायरल होत आहे. त्यामध्ये रस्त्याच्या कडेला एक बेघर माणूस आपल्या अन्नातील काही भाग मुक्या जनावरांना देताना दिसला आहे.
आजूबाजूचा परिसर पाहता, व्हायरल व्हिडीओ परदेशातील असावा. एक बेघर माणूस स्वतःच्या परिस्थितीअभावी रस्त्याच्या कडेला बसून असल्याचे दिसत आहे. पण, परिस्थिती बिकट असूनही त्याच्या मनातून इतरांना मदत करण्याची भावना कमी झाली नसल्याचे त्यानं दाखवून दिलंय. कारण- श्वानाची काही पिल्लं त्याच्या बाजूला येऊन, जणू काही भुकेसाठी विनवणी करताना दिसत आहेत. मग या व्यक्तीनंही स्वतःकडील अन्नातील काही घास या मुक्या छबुकड्यांना खाऊ घातले आहेत; जे पाहून तुमच्याही डोळ्यांत नक्कीच पाणी येईल. नेमकं काय घडलं ते व्हायरल व्हिडीओतून तुम्हीसुद्धा बघा.
हेही वाचा…बेकरी मालकाचं किळसवाणं कृत्य; केर काढताना केलं असं काही की… VIDEO तील ‘ते’ दृश्य पाहून होईल संताप
व्हिडीओ नक्की बघा…
व्हायरल व्हिडीओत तुम्ही पाहिलं असेल की, एक बेघर माणूस रस्त्याच्या कडेला कार्पेटवर बसलेला दिसत आहे आणि त्याच्या पायाजवळ येऊन श्वानाची काही पिल्लं बसली आहेत. यादरम्यान व्यक्ती काहीतरी खात असते. ते पाहून श्वानाची ती पिल्लंही त्या माणसाकडे आशेने बघत आहेत. हे पाहून त्यानं स्वतःकडील अन्नाचं विभाजन करून, तो त्यांना प्रेमानं, मोठ्या मानानं खाऊ घालतो. आपल्याकडे थोडकेच अन्न असूनही भुकेनं व्याकुळलेल्या त्या प्राणिमित्रांना अन्न देण्याच्या माणसाच्या कृतीनं अनेकांची मनं जिंकली आहेत, असे म्हणायला हरकत नाही.
सोशल मीडियावर हा व्हिडीओ @sachkadwahai या इन्स्टाग्राम अकाउंटवरून शेअर करण्यात आला आहे. “स्वत:कडे थोडेसे अन्न असूनही, पिल्लांबरोबर शेअर करताना दिसला’, अशी कॅप्शन या व्हिडीओला देण्यात आली आहे. हा व्हिडीओ पाहून नेटकरीसुद्धा भावूक झाले आहेत. या माणसाला मदत केली पाहिजे, देव तुझं भलं करो आदी अनेक कमेंट्स नेटकरी व्हिडीओखाली करताना दिसून आले आहेत. एकूणच या भावूक करणाऱ्या व्हिडीओनं अनेकांचं लक्ष वेधून घेतलं आहे.
