Kid driving Tempo: सोशल मीडियावर लहान मुलांचे अनेक व्हिडीओ सतत व्हायरल होत असतात. हल्लीची ही मुलं सोशल मीडियावरील बदलत्या ट्रेंडनुसार वागताना, बोलताना दिसतात. लहान मुलांना नवनवीन गोष्टी शिकण्याची खूप उत्सुकता असते आणि ती गोष्ट एकदा जमली की, ते अनेकदा त्याच्या आहारी जातात. पण, काही गोष्टी शिकण्याचा आणि शिकवण्याचा एक वेळ वा काळ असतो आणि हे प्रामुख्यानं त्यांच्या पालकांना कळलं पाहिजे. आवड म्हणून पालक आपल्या मुलांना हवं ते करण्याची परवानगी देतात आणि त्यासाठई त्यांना पाठबळही देतात.
सध्या असाच एक व्हिडीओ सोशल मीडियावर व्हायरल होतोय, ज्यात एक लहान मुलगा टेम्पो चालवताना दिसतोय. एवढ्या लहान वयात टेम्पो चालवणं त्याच्या जीवावरही बेतू शकतं. परंतु, पालकांचा निष्काळजीपणा अनेकदा मुलांच्या अशा बेफिकीर वागण्याला कारणीभूत ठरतो.
मुलगा चालवतोय टेम्पो
लहान मुलाचा हा व्हिडीओ सध्या चर्चेचा विषय ठरला आहे. व्हिडीओमध्ये मुलगा पिकअप टेम्पो चालवताना दिसतोय. चालकाच्या आसनावर बसलेल्या मुलाने मागे पाण्याचा रिकामी जार ठेवला आहे; जेणेकरून त्याला गाडी नीट चालवता येईल. परंतु, आवड असली तरी या वयात लहान मुलांना गाडी हाताळायला देणंच चुकीचं आहे. त्याच दृष्टिकोनातून सरकारी प्रशासनाने नियम करून, १८ वर्षांपेक्षा कमी वयाच्या कोणीही गाडी चालवणं हा एक गुन्हाच ठरवला आहे.
सोशल मीडियावर व्हायरल झालेला हा व्हिडीओ @babya6132 या इन्स्टाग्राम अकाउंटवरून शेअर करण्यात आला असून, ‘नाद’ अशी कॅप्शन या व्हिडीओला देण्यात आली आहे. व्हिडीओ व्हायरल होताच त्याला तब्बल १.३ दशलक्ष व्ह्युज आले आहेत.
युजर्सच्या संतप्त प्रतिक्रिया
हा व्हिडीओ सोशल मीडियावर व्हायरल होताच अनेकांनी त्यावर संमिश्र प्रतिक्रिया व्यक्त केल्या आहेत. एका युजरनं कमेंट करीत लिहिलं, “खूप छान गाडी चालवतोय तुमचा बाळ; पण दादा त्याचं हे वय नाही. आता त्याला शिक्षणाची गरज आहे. योग्य वेळ आल्यावर आणि वय झाल्यावरच त्याच्या हातात गाडी द्या.” तर दुसऱ्यानं “नादच आहे हा. या वयात काय भारी गाडी चालवतोय,” अशी कमेंट केली.
एक जण कमेंट करत म्हणाला, “ही सगळी फालतूगिरी आहे. ज्या त्या वयात ज्या त्या गोष्टी कराव्यात. हाच व्हिडीओ आरटीओच्या हाती लागला, तर तुमच्यावर लवकरच कारवाई होऊ शकते.” तर एकानं, “आई-वडिलांना लाज वाटली पाहिजे. आपण काय शिकवतोय मुलांना”, अशीदेखील कमेंट केली.
