Lizard Found Inside Amazon Parcel: आजकाल सगळ्याच गोष्टी ऑनलाईन झाल्याने अधिकतर लोकं प्रत्यक्षात बाजारात जाऊन खरेदी करण्यापेक्षा ऑनलाईन गोष्टी खरेदी करण्यास प्राधान्य देतात. घरच्या घरी फोनमधून दोन बटणं दाबली की आपल्याला हवी ती वस्तू आपल्या दारात येते. सोयी-सुविधा जशा वाढत गेल्या तसे यांचे दुष्परिणामही दिसू लागले.
ऑनलाईन वस्तू मागवल्या की नेहमीच त्या जशाच्या तशा येत नाहीत बरं का! कधी कधी त्या वस्तू खराब निघतात, तर कधी ग्राहकांबरोबर फ्रॉड होतो. सोशल मीडियावर अशाप्रकारचे अनेक व्हिडीओ व्हायरल तर होतच असतात परंतु काही व्हिडीओ धक्कादायक असतात. आपण अनेकदा ऑनलाईन मागवलेल्या वस्तूंमध्ये किडे, साप, गांडूळ अशाप्रकारचे प्राणी सापडलेले व्हिडीओ आणि फोटो सोशल मीडियावर पाहिले असतील असाच एक फोटो सध्या सोशल मी़डियावर तुफान व्हायरल होतोय.
या भयानक घटनेत, कोलंबियातील एका महिलेने एअर फ्रायरची ऑनलाइन ऑर्डर दिली होती, तिच्या ऑर्डर केलेल्या एअर फ्रायरसह तिला त्या बॉक्समध्ये जिवंत सरडा सापडला. महिलेने खरेदी केलेले नवीन एअर फ्रायर बाहेर काढण्यासाठी बॉक्स अनपॅक करताच एअर फ्रायरसह तिला सरपटणारा प्राणी सापडला (Spanish Rock Lizard) यामुळे तिला जबरदस्त धक्का बसला.
व्हायरल पोस्ट (Lizard Found Inside Amazon Parcel Viral Post)
कोलंबियातील या महिलेचे नाव सोफिया सेरानो (Sofia Serrano) असे आहे. सोफियाने १६ जुलै रोजी या घटनेबद्दल तिच्या एक्स अकाउंटवर एक पोस्ट शेअर केली. त्या पोस्टमध्ये तिने या ऑर्डरच्या बॉक्सचा फोटो शेअर केला, ज्यात भलामोठा जिवंत सरडा दिसतोय. “मी ॲमेझॉनद्वारे एअर फ्रायरची ऑर्डर दिली होती आणि ती ऑर्डर एका साथीदारासह आली. मला माहित नाही की यात ॲमेझॉनची चूक आहे की वाहक कंपनीची” असं कॅप्शन तिने या पोस्टला दिलं.
पहिली पोस्ट शेअर केल्यानंतर सोफियाने पुन्हा एकदा ट्वीट करत लिहिलं की, “आम्हाला माहित आहे की या पार्सलची संपूर्ण जबाबदारी ॲमेझॉनची आहे. कारण जिथे एअर फ्रायर बॉक्समध्ये पॅक केला गेला त्याचवेळी हा सरडा या बॉक्समध्ये ठेवण्यात आला. आता ॲमेझॉन याची जबाबदारी घेत नाही आहे आणि सध्याची परिस्थिती खूप गंभीर आहे.” पुढे त्या प्राण्याबद्दल काळजी व्यक्त करत ती म्हणाली की, एवढ्या घट्ट पॅक केलेल्या या बॉक्समध्ये त्या सरड्याचा जीवही जाऊ शकला असता.
ॲमेझॉनची प्रतिक्रिया (Amazon reply on Lizard Found Inside Parcel)
सोफिया सेरानोची पोस्ट व्हायरल होताच ॲमेझॉनने तिच्या ट्वीटवर रिप्लाय दिला. ॲमेझॉनने रिप्लाय देत एक लिंक शेअर केली आणि त्यावर तिची संपूर्ण समस्या सांगण्याची विनंती केली. तथापि, त्यानंतर सोफियाने नमूद केलं की, त्यांनी दिलेल्या उत्तरावर ती समाधानी नव्हती. कारण- त्यांनी सोफियाला एअर फ्रायर परत करण्यास सांगितला आणि त्याबदल्यात तिचे पैसे तिला परत करण्याचे आश्वासन दिले.
