मतदानावेळी तेंडुलकरला पाहून क्रिकेटवेड्या पोलिंग ऑफिसरने केलं ‘हे’ कृत्य

वांद्रे पश्चिमेतील मतदान केंद्रावर दुपारच्या सुमारास पत्नी अंजली तेंडुलकर आणि मुलगा अर्जुन तेंडुलकरसोबत सचिन पोहोचला होता. सचिनला मतदान केंद्रावर आल्याचं पाहताच एक पोलिंग अधिकारी लेदरचा बॉल घेऊन सचिनकडे गेला आणि त्या बॉलवर सचिनची स्वाक्षरी मागितली. सचिननेही त्या अधिकाऱ्याला निराश केलं नाही आणि त्या लाल रंगाच्या बॉलवर स्वाक्षरीही केली. आवडत्या क्रिकेटपटूची स्वाक्षरी मिळाल्याने पोलिंग ऑफिसरचा आनंदही द्विगुणीत झाला.

मतदानाचा हक्क बजावल्यानंतर सचिननं कुटुंबासोबत फोटोदेखील काढला. मात्र सचिनची मुलगी सारा तेंडुलकर मतदानाला आली नाही. ती परदेशात असल्याने मतदानासाठी उपस्थित राहू न शकल्याची माहिती आहे. ती सध्या लंडनमधील युनिव्हर्सिटी कॉलेज लंडनमध्ये शिक्षण घेत आहे. त्यामुळेच तिला मतदानासाठी मुंबईमध्ये येता आले नसल्याची माहिती आहे.