Shocking Video: माणसांचं आणि श्वानांचं नातं अगदी खास असतं. निष्ठावंत प्राणी म्हणून श्वानाची ओळख आहे. तसंच श्वानांचं पालकत्व स्वीकारलेली लोकंही त्यांना खूप जीव लावतात. त्यांच्या सगळ्या गोष्टींची काळजी घेतात. पण, या कलियुगात अशीही लोक आहेत जी प्राण्यांवर मालकी गाजवतात आणि स्वत:ला हवं तसं त्यांना वागतात. मग ते त्यांच्या जीवाची पर्वादेखील करत नाहीत. सध्या असाच एक व्हिडीओ सोशल मीडियावर व्हायरल होतोय, ज्यात एक माणूस श्वानांच्या जीवाशी खेळताना दिसतोय.
व्हायरल व्हिडीओ
सोशल मीडियावर व्हायरल झालेल्या व्हिडीओत बंगळूरूच्या कल्याणनगर भागात एक माणूस त्याच्या कारच्या छतावर तीन श्वान घेऊन फिरताना दिसला. गाडीच्या छतावर श्वान ठेवत त्याने गाडी चालवली. एका वाहनचालकाने या घटनेबाबत विचारणा केली असता, वाहन चालवणाऱ्या व्यक्तीने अपमानास्पद प्रतिक्रिया दिली.
कारचालकाने मोटारचालकास शिवीगाळ केली आणि तीन श्वानांना छतावर उभे करून तो आपली कार रस्त्यावर चालवत राहिला. दोन वाहनचालकांमधील हा संवाद या व्हिडीओमध्ये रेकॉर्ड झाला आहे. व्हिडीओमध्ये एक मोटारचालक आपले वाहन कारच्या शेजारी थांबवून कारच्या छतावर ठेवलेल्या श्वानांबरोबर गाडी चालवण्याच्या कृतीवर प्रश्नचिन्ह उपस्थित करताना दिसला. “माफ करा, पण हे सुरक्षित नाही”, असं मोटारचालक म्हणाला. त्याला भररस्त्यात असं सांगितलं म्हणून कारचालकाने त्यालाच शिवीगाळ करण्यास सुरुवात केली.
“माझ्या कारचा नंबर आणि सर्व काही घे”, असं म्हणत त्याने मोटारचालकाला शिवीगाळ केली. या सगळ्यानंतरही श्वानांना खाली उतरवून कारच्या आत सुरक्षितपणे घेऊन जाण्याऐवजी, त्या माणसाने रस्त्यावर तशीच कार चालवणं सुरू ठेवलं.
सोशल मीडियावर व्हायरल झालेला हा व्हिडीओ @Chethan_Surya_S या एक्स अकाउंटवरून शेअर करण्यात आला असून या व्हिडीओच्या कॅप्शनमध्ये लिहिलं आहे की, “छतावर तीन श्वानांसह कार सुमारे दोन किमी चालवली गेली. ही घटना ३ डिसेंबरच्या रात्री घडली. श्वानांना पडण्यापासून वाचवण्यासाठी त्यांना कोणतीही दोरी, हार्नेस किंवा साखळी बांधलेली नव्हती. विशेष म्हणजे मोठमोठ्याने गाणी वाजवत कार चालवली जात होती. कारच्या मागे प्रेस लेबल होतं, तसंच ‘हरीला जोखीम आवडते’ असं लिहिलं होतं.”
अनेक इंटरनेट युजर्सने हा व्हिडीओ सोशल मीडिया प्लॅटफॉर्मवर शेअर करून पोलिसांचे लक्ष वेधले. नेटकऱ्यांनी पोलिसांना या प्रकरणात लक्ष घालण्याची आणि त्याच्या छतावर तीन निष्पाप जीवांसह कार चालवणाऱ्या व्यक्तीला कठोर शिक्षा देण्याची विनंती केली. व्हिडीओ ऑनलाइन व्हायरल होताच, बेंगळुरू शहर पोलिसांनी X वर प्रतिक्रिया दिली. त्यांच्या पोस्टमध्ये पोलिस पथकाने लिहिले की, त्यांनी या घटनेची माहिती स्थानिक पोलिस ठाण्याला दिली आहे, जिथे कार दिसली होती.
u
“आम्ही आवश्यक कारवाईसाठी संबंधित पोलिस अधिकाऱ्यांना कळवले आहे”, शहर पोलिसांच्या अधिकृत आणि मुख्य X (पूर्वीचे ट्विटर) हँडलने पोलिस उपायुक्त, पूर्व विभाग आणि बनासवाडी पोलिस ठाण्याला टॅग करत लिहिले आहे.
अटक झाली
घटनेच्या संदर्भात एका अपडेटमध्ये त्या व्यक्तीला पोलिसांनी अटक केली होती आणि त्याची ओळख हरीश नावाच्या हेअरस्टायलिस्ट म्हणून करण्यात आली होती, ज्याने बनावट “प्रेस” लेबल लावून आपली कार चालवली होती.
बनासवाडी पोलिसांनी हरीश विरुद्ध प्राण्यांवर क्रूरता प्रतिबंधक कायदा आणि भारतीय न्याय संहिता (बीएनएस) च्या कलम 351 (2) (गुन्हेगारी धमकी) अंतर्गत गुन्हा नोंदवला, टाइम्स ऑफ इंडियाने नोंदवले की, पोलिसांनी त्याला त्याच्या घरातून अटक करण्यासाठी नंबर प्लेटवरून कारचा नोंदणीकृत पत्ता शोधून काढला. तसेच, पुढील तपास सुरू असल्याचे सांगून पोलिसांनी त्याचे वाहन जप्त केले आहे.
