‘एमडीएच मसाले’ हा भारतातील मसाल्यांचा एक प्रसिद्ध ब्रॅंड आहे. गेली कित्येक वर्ष आपण एमडीएच मसाल्यांच्या जाहिराती पाहत आहोत. या बरोबरच या ब्रॅंडचा चेहरा असलेले महाशय धर्मपाल गुलाटी हेही तिथेच प्रसिद्ध आहेत. मात्र, गेल्या वर्षी म्हणजेच २०२० मध्ये त्यांनी वयाच्या ९८ व्या वर्षी अखेरचा श्वास घेतला. ते ‘एमडीएच अंकल’, ‘दादाजी’, ‘मसाला किंग’ आणि ‘किंग ऑफ स्पाइस’ या नावांनी देखील ओळखले जायचे. धर्मपाल गुलाटी यांनी या व्यवसायाची सुरुवात एक लहानशा दुकानातून केली आणि यानंतर त्याचे एका मोठ्या ब्रॅंडमध्ये रूपांतर केले.
आज ‘एमडीएच मसाले’ यशाच्या शिखरावर असून हा भारतातील ब्रँडेड मसाल्यांच्या सर्वात मोठ्या उत्पादक आणि विक्रेत्यांपैकी एक आहे. या प्रवासात धर्मपाल यांचे योगदान अत्यंत मोलाचे आहे. या मसाल्यांच्या जाहिरातींमधून ते भारतातील घराघरात पोहोचले. मात्र, त्यांच्या निधनानंतर या ब्रॅंडचा वारसा पुढे घेऊन जाणे ही कंपनीसमोरील एक मोठी समस्या होती. तसेच, ब्रँडच्या जाहिरातींमध्ये धर्मपाल गुलाटी यांची जागा कोण घेणार हा सर्वात मोठा प्रश्न होता.
आता हा पेच सुटला आहे. नव्या जाहिरातींमध्ये एका व्यक्तीने गुलाटी यांची जागा घेतली असून ही व्यक्ती कोण आहे, हे जाणून घेण्याची सर्वांचीच उत्सुकता वाढली आहे. तर, या नव्या जाहिरातींमध्ये दिसणारा ही व्यक्ती इतर कोणीही नसून धर्मपाल गुलाटी यांचे पुत्र राजीव गुलाटी आहेत. धर्मपाल गुलाटी यांच्या निधनानंतर राजीव गुलाटी यांनी ‘एमडीएच मसाले’ ही कंपनी ताब्यात घेतली आहे. राजीव यांना एमडीएचला आंतरराष्ट्रीय दर्जा देण्याचे श्रेय देण्यात आले आहे. सध्या ही कंपनी अमेरिका, कॅनडा, युरोप, युनायटेड किंगडम, दक्षिण-पूर्व आशिया, जपान, सौदी अरब येथे निर्यात करत असून शारजाहमध्ये कंपनीचे एक उत्पादन युनिट आहे.
नाणेघाटातील उलट दिशेने वाहणारा धबधबा देशभरात ठरतोय चर्चेचा विषय; Viral Video तुम्ही पाहिला का?
धर्मपाल गुलाटी यांच्या निधनानंतर, एमडीएच कंपनी विकण्यात येणार असल्याच्या चर्चांना उधाण आले होते. दरम्यान, राजीव गुलाटी यांनी ही बातमी खोटी आणि बनावट असल्याच म्हटलं आहे. ते म्हणतात, ‘ही बातमी निराधार असून एमडीएच प्रायव्हेट लिमिटेड हा आमचा वारसा आहे. महाशय चुन्नीलाल आणि महाशय धरमपाल यांनी आपले संपूर्ण आयुष्य खर्च करून ही कंपनी उभारली आहे. हा वारसा पुढे नेण्यासाठी आम्ही कटिबद्ध आहोत. कृपया अशा अफवांवर विश्वास ठेवू नका.’
महिला पत्रकाराने कॅमेरासमोरच तरुणाला लगावली कानाखाली, नेमकं असं काय घडलं? पाहा Viral Video
दरम्यान, एमडीएचने त्यांच्या अधिकृत ट्विटर खात्यावर पोस्ट केलेल्या संदेशात, या अफवांवर विश्वास न ठेवण्याचे आवाहन केले आहे. आता राजीव आपल्या वडिलांचा वारसा पुढे चालवणार असून, कंपनीच्या आगामी जाहिरातींमध्ये ते धर्मपाल गुलाटी यांच्या जागी दिसणार आहेत.
