आई आणि तिच्या लेकरांचं नातं अगदी खास असतं. काळजाच्या तुकड्याप्रमाणे आपल्या लेकरांना जपणारी आई प्रत्यही अनेकदा संकटांना सामोरी जात असते. अगदी जन्म दिल्यापासून ते मूल मोठं होईपर्यंत आई आपल्या मुलांना सांभाळते, त्यांचं रक्षण करते. लहान-मोठ्या सगळ्या संकटांत ती आपल्या मुलांच्या पाठीशी खंबीरपणे उभी राहते. आपल्या लेकराला कुठे खरचटलं तरी आईचा जीव वर-खाली होतो. अशा वेळेस जर आपलं लेकरू अचानक गाडीसमोर आलं, तर त्या आईचं काय होईल याचा विचार करा. सध्या सोशल मीडियावर एक व्हिडीओ व्हायरल होतोय. या व्हिडीओत आई आपल्या लेकीचा जीव वाचवण्यासाठी आपला जीव धोक्यात टाकते.
व्हायरल व्हिडीओ
व्हायरल झालेला हा व्हिडीओ सध्या चर्चेत आहे. या व्हिडीओत नवरा-बायको आणि त्यांची लहान मुलगी बाईकवर बसून आपल्या इच्छित स्थळी जायला निघत असतात. इतक्यात अचानक लहानगी बाईकवर बसण्याऐवजी रस्त्यावर पळत सुटते. गाड्यांच्या गर्दीत रस्त्यावर पळताना अचानक एक कार तिच्यासमोर येते. पण, असे घडण्याआधीच मुलीला पळताना पाहून आई लगेच बाईकवरून उतरते आणि क्षणाचाही विलंब न करता, तिच्यामागे पळत सुटते. मातेने तत्परता दाखविल्यामुळेच चिमुकली कारजवळ पोहोचण्याआधीच आई तिला पकडते आणि तोल गेल्यामुळे दोघी खाली कोसळतात. या घटनेमुळे आजूबाजूला गर्दी जमा होते. तेवढ्यात मागून मुलीचे वडीलदेखील धावत येतात आणि मुलीला लगेच उचलतात.
@sp__prithivi या इन्स्टाग्राम अकाउंटवरून शेअर करण्यात आलेल्या या व्हिडीओला ‘अम्मा’ अशी कॅप्शन देण्यात आली आहे. व्हिडीओ शेअर केल्यापासून ते आतापर्यंत या व्हिडीओला तब्बल २.५ दशलक्ष व्ह्युज आले आहेत.
हेही वाचा… एका बापाची मजबुरी! कोणत्याच मुलावर ‘हे’ बघायची वेळ येऊ नये; VIDEO पाहून व्हाल निशब्द
युजर्सच्या प्रतिक्रिया
व्हिडीओ व्हायरल होताच अनेकांनी त्यावर आपापल्या प्रतिक्रिया शेअर केल्या आहेत. एका युजरने कमेंट करीत लिहिलं की, आईची जागा जगात कोणीच घेऊ शकत नाही. तर दुसऱ्याने, कारचालकाला धन्यवाद म्हणा. त्यानं मुलीला पाहताच कार थांबवली, अशी कमेंट केली. तर एक जण कमेंट करीत म्हणाला, “आई नेहमीच महान असते.”
