“मुंबईकरांनो हे जगणं आहे की मरणं”; लोकल ट्रेन प्रवासाचा धक्कादायक VIDEO पाहून तुम्हीच सांगा हे कितपत योग्य?

सोशल मीडियावर व्हायरल होणाऱ्या या व्हिडीओत गर्दीच्या वेळी मुंबईकर ट्रेनच्या दरवाजाला, तर कधी ट्रेन डब्याबाहेरील अगदी छोट्याशा जागेत लटकून प्रवास करीत असल्याचे भयानक दृश्य दिसतेय. पण हेच मुंबईकरांचं रोजचं जगणं आहे. कितीही गर्दी असो, धक्काबुक्की होवो; पण ट्रेनमध्ये चढण्यासाठी जागा मिळवायचीच हे मुंबईकरांचं रोजचं लक्ष्य असतं आणि हे ज्याला जमलं, तोच मुंबईत प्रवास करू शकतो; पण काहींना ते शक्य होत नाही. अशा वेळी ते जीवघेणे मार्ग शोधून काढतात. असाच एक जीवघेणा मार्ग एका प्रवाशाने शोधल्याचे या व्हिडीओमध्ये दिसतेय. व्हिडीओत प्रवासी ट्रेनमध्ये चढण्यास न मिळाल्याने कामाचे ठिकाण गाठण्यासाठी जीव धोक्यात घालताना दिसतोय. हे दृश्य मुंबई लोकल प्रवासाच्या भयानक परिस्थितीवर प्रकाश टाकणारे आहे.

मुंबईकरांच्या जगण्या-मरण्याचा खेळ

व्हायरल व्हिडीओत तुम्ही पाहू शकता की, प्रवाशांनी गच्च भरलेली एक ट्रेन वेगाने धावतेय. यावेळी ट्रेनच्या दरवाजावर अनेक जण अक्षरश: लटकल प्रवास करतायत. यावेळी तिथे धड उभेही राहणे कठीण होतेय; पण तरीही तेथे अनेक प्रवासी कसातरी स्वत:चा तोल सांभाळून उभे आहेत. त्यात चुकूनही एकाचा जरी हात सुटला तरी तो जीवाशी मुकू शकतो. पण, तरीही मुंबईकरांना जीवावर उधार होऊन असा प्रवास करावा लागतो. व्हिडीओत एका व्यक्तीने ट्रेनमध्ये चढण्यास जागा न मिळाल्याने दरवाजाच्या मागे असलेल्या एका रॉडवर लटकून प्रवास केला. इतकेच नाही, तर ट्रेनच्या बंद दरवाजावरही काही जण धोकादायक पद्धतीने लटकत उभे आहेत.

मुंबई लोकल प्रवासाची भीषण परिस्थिती दाखविणारा हा व्हिडीओ me_ghatkoparkar
नावाच्या इन्स्टाग्राम अकाउंटवरून पोस्ट करण्यात आला आहे. त्यावर अनेक जण कमेंट्स करीत मुंबई लोकल प्रवासाचे अनुभव सांगत आहेत. एकाने लिहिले की, भावा, लोक मुंबईत अशाच प्रकारे रोज जीवाशी खेळून कामावरती जातात. दुसऱ्याने लिहिले की, ये है मुंबई मेरी जान. तर, अनेकांनी मुंबईकरांना अशा जीवघेण्या पद्धतीने प्रवास न करण्याची विनंती केली आहे.