“जीवापेक्षा जबाबदारीचं ओझ मोठं?” विरारकरांनाच ‘या’ प्रवाशाचे दु:ख कळू शकते; मुंबई लोकलच्या जीवघेण्या प्रवासाचा VIDEO

तुम्ही कधी सकाळच्या वेळात विरारहून सुटणाऱ्या ट्रेनने प्रवास केला असेल, तर तुम्हाला प्रवाशांना ट्रेनमध्ये चढण्यासाठी किती संघर्ष करावा लागतो हे ठाऊक असेल. या ट्रेनमध्ये प्रवाशांना नीट उभं राहण्यासाठी जागा मिळणे तर सोडाच, पण आत शिरण्यासाठीदेखील जागा दिली जात नाही. अशा परिस्थितीत अनेकांना रोज नोकरी-धंद्याचे ठिकाण वेळेत गाठण्यासाठी मोठा संघर्ष करावा लागतो. रोजचा लेटमार्क अनेकांना परवडणारा नसतो आणि त्यामुळे प्रवासी अतिशय जीवघेण्या पद्धतीने प्रवास करत आपले स्थान गाठतात. या व्हिडीओतही तेच दिसतेय. एक प्रवासी ट्रेनमध्ये चढण्यासाठी जागा न मिळाल्याने ट्रेनच्या डब्यामागील लोखंडी रॉडवर लटकून जीवघेणा प्रवास करतोय. जीवापेक्षा जबाबदारीचं ओझे मोठे असल्याने तो अशा प्रकारे प्रवास करतोय.

“जीवापेक्षा जबाबदारीचे ओझे”`

व्हिडीओत तुम्ही पाहू शकता की, रेल्वे प्लॅटफॉर्मवरून एक ट्रेन पास होताना दिसतेय. यावेळी एका ट्रेनच्या डब्यामागे एक प्रवासी लटकून उभा असल्याचे दिसतेय. हा प्रवासी धावत्या ट्रेनच्या डब्यामागील लोखंडी रॉडवर उभा राहून प्रवास करतोय. यावेळी जराही तोल गेला किंवा हात निसटला, तर त्याच्या जीवावर बेतू शकतं; पण जीवापेक्षा जबाबदारीच्या ओझ्यामुळे तो अशा प्रकारे प्रवास करतोय, असे मत अनेकांनी कमेंट्समध्ये मांडलेय.

हा व्हिडीओ @nallasopara.memes नावाच्या अकाउंटवरून पोस्ट करण्यात आला आहे, जो विरार-चर्चगेट लोकलचा असल्याचे लिहिले आहे. एकाने लिहिलेय की, प्रत्येकाची मजबुरी असते. दुसऱ्याने लिहिलेय की, हे दृश्य हास्यास्पद नाही, तर खूप दु:खद आहे. तरीही रेल्वे प्रशासनाला सर्व ट्रेन्स एसी करायच्या आहेत.