‘इन्फोसिस’चे सह-संस्थापक नारायण मूर्ती टाइम मॅनेजमेंट म्हणजेच वेळेच्या नियोजनाला फार महत्त्व देतात. विशेष म्हणजे केवळ शाब्दिक महत्त्व पटवून देण्याऐवजी आपल्या कृतीमधून आपल्याला खरोखरच वेळेच्या नियोजनाची चिंता आहे हे अधोरेखित करण्याचा नारायण मूर्तींचा प्रयत्न असतो. हेच महत्त्व पटवून देण्यासाठी काही वर्ष ते रोज सकाळी ६ वाजून २० मिनिटांना ऑफिसमध्ये पोहचलेले असायचे. सकाळी ६.२० ते रात्री अगदी आठ आणि नऊ वाजेपर्यंत ते काम करायचे. ‘मनी कंट्रोल’ला दिलेल्या मुलाखतीमध्ये ७६ वर्षीय नारायण मूर्तींनी ‘इन्फोसिस’ला उभं करण्यासाठी दिलेला वेळ आणि त्यामुळे मुलांसाठी न देता आलेला वेळ याबद्दल भाष्य केलं त्यावेळेस हा किस्सा सांगितलं.
मुलाखतीदरम्यान मुलाखतकाराने नारायण मूर्तींचं कामावर किती प्रेम आहे हे सांगताना ते रोज ‘इन्फोसिस’च्या कॅम्पसमध्ये सकाळी सात वाजेपर्यंत हजर असायचे असा उल्लेख केला. त्यावेळी मूर्तींनी या मुलाखतकाराला “सात नाही ६ वाजून २० मिनिटांनी” असं सांगितलं. सकाळी सहा वाजून २० मिनिटांनी ऑफिसला पोहचण्याची सवय मी स्वत:ला लावून घेतली होती असं त्यांनी सांगितलं. अगदी २०११ साली निवृत्त होईपर्यंत आपण कटाक्षाने ही गोष्ट पाळली असंही ते म्हणाले.
ठरलेल्या वेळी ऑफिसला पोहोचण्याच्या आपल्या या सवयीबद्दल बोलताना नारायण मूर्तींनी, “तरुणांना वेळेत ऑफिसवर पोहोचण्याचं महत्त्व पटवून देण्यासाठी मी हे करायचो,” असं सांगितलं. ‘इन्फोसिस’ला उभं करण्यासाठी अनेक गोष्टींचा त्याग करावा लागला. त्यातही माझी दोन्ही मुलं रोहन आणि अक्षता या दोघांबरोबर वेळ घालवता आला नाही हा माझा सर्वात मोठा त्याग होता, असंही नारायण मूर्ती म्हणाले.
“उद्योग सुरु करणं हे हिंमतीचं काम आहे. हे त्यागाचं आणि धमक दाखवण्याचं काम आहे,” असं नारायण मूर्ती म्हणाले. “या साऱ्यामध्ये सर्वात मोठा तोटा आमच्या मुलांचा म्हणजेच अक्षता आणि रोहनचा झाला. खरी गोष्ट ही आहे की मला त्यांच्याबरोबर वेळ घालवता आला नाही. सुधानेच त्यांची काळजी घेतली,” असं नारायण मूर्ती म्हणाले. “त्यांना हव्या नको त्या सर्व गोष्टी, त्यांचं यश, त्यांची पीएचडी, स्टॅण्डफोर्डमधील शिक्षण हे सारं तिच्यामुळेच शक्य झालं,” असंही नारायण मूर्ती म्हणाले.
१९८१ साली नारायण मूर्तींनी पत्नीकडून १० हजार रुपये कर्ज घेऊन ‘इन्फोसिस’ची स्थापना केली होती. सध्या या कंपनीमध्ये ३ लाख २५ हजार लोक काम करतात. या कंपनीचं मूल्य ८० बिलीयन अमेरिकी डॉलर्स इतकं आहे.
