सध्या जगामध्ये ओमायक्रॉनने थैमान घातलं आहे. भारतामध्येही करोनाबाधितांची संख्या झपाट्याने वाढताना दिसतेय. मात्र एकीकडे या नवीन विषाणूचा फैलाव होत असतानाच फ्रान्स आणि जगातील इतर काही देशांमध्येही करोनाचे नवीन व्हेरिएंट आढळून आले आहेत. २०१९ साली पहिल्यांदा चीनमध्ये करोनाचा प्रादुर्भाव झाल्यानंतर तेव्हापासून आजपर्यंत जगातील वेगवेगळ्या देशांमध्ये करोनाचे वेगवेगळे व्हेरिएंट आढळून आलेत. मात्र दक्षिण आफ्रिकेमध्ये उत्पत्ती झालेल्या ओमायक्रॉनबद्दल संभ्रम कायम असतानाच दुसरीकडे नायझेरियामध्ये नवीन व्हेरिएंट सापडल्याचं एक ट्विट सोशल मीडियावर व्हायरल झालंय. विशेष म्हणजे हे ट्विट या बातमीसाठी व्हायरल झालं नसून त्यावर आलेल्या रिप्लायमुळे व्हायरल झालंय. त्याहूनही खास गोष्ट म्हणजे महिंद्रा अ‍ॅण्ड महिंद्राचे सर्वेसर्वा आनंद महिंद्रांनीही या रिप्लायशी आपण सहमत असल्याचं म्हटलंय.
सोशल मीडियावर व्हायरल होणाऱ्या या पोस्टमध्ये एका व्यक्तीने नायझेरियन व्हेरिएंटबद्दलची माहिती दिलीय. “नुकतीच समोर आलेली बातमी : नायझेरियामध्ये करोनाचा नवीन स्ट्रेन आढळून आळाय. हा स्ट्रेन युकेमध्ये (युनायटेड किंग्डम) आढळलेल्या व्हेरिएंटहून वेगळाय,” असं या व्यक्तीने म्हटलंय.
याच पोस्टवर सुशील यादव नावाच्या व्यक्तीने अगदीच मजेदार रिप्लाय दिलाय. “प्रत्येक देशाने आपआपला एक एक व्हेरिएंट काढावा. वर्षाच्या शेवटी आपण करोनाव्हायरल विश्वचषक स्पर्धा भरवूयात,” असा उपहासात्मक टोला यादव नावाच्या या व्यक्तीने लगावलाय.
नक्की पाहा हे फोटो >> Photos: ‘या’ देशांमध्ये करोनाचा एकही रुग्ण आढळला नाही; यादीतील शेवटचे दोन देश पाहून आश्चर्य वाटेल
मागील दोन दिवसांपासून सोशल मीडियावर या संवादाचा फोटो व्हायरल होतोय. हाच फोटो आनंद महिंद्रांनाही सिग्नल अ‍ॅपवर मिळाला. त्यांनी तो इंडियन ह्युमर म्हणजेच भारतीय विनोद या हॅशटॅगसहीत ट्विटरवरुन शेअऱ केलाय. “मझा या विचाराला पाठिंबा आहे,” असं महिंद्रा यांनी कॅप्शनमध्ये हा मजेदार फोटो शेअर करताना म्हटलंय. म्हणजेच प्रत्येक देशाने करोनाचा एक एक व्हेरिएंट काढावा आणि वर्षाच्या शेवटी करोना विश्वचषक स्पर्धा भरवायची या उपहात्मक मागणीला आपण पाठिंबा देत आहोत असच महिंद्रा यांनी जाहीर केलंय.
खरं तर हा सारा संवाद आणि नायझेरियन व्हेरिएंट हे २०२० च्या शेवटच्या महिन्यामधील व्हायरल बातमीसंदर्भात आहे. मात्र सध्या ओमायक्रॉन आणि फ्रान्समध्ये आढळून आलेल्या व्हेरिएंटच्या पार्श्वभूमीवर व्हायरल झाल्याचं पहायसला मिळतंय.