Italy PM Giorgia Meloni Shares Selfie With PM Modi : संयुक्त अरब अमिराती (यूएई)मध्ये हवामान बदलासंदर्भात आयोजित COP-28 शिखर परिषदेत पंतप्रधान नरेंद्र मोदी यांच्यासह जगभरातील अनेक नेत्यांनी हजेरी लावली होती. यावेळी मोदींनी जगभरातील नेत्यांची भेट घेतली. यामध्ये इटलीच्या पंतप्रधान जॉर्जिया मेलोनी यांचाही समावेश होता. मेलोनी यांनी पीएम मोदींबरोबरचा एक खास फोटोही शेअर केला आहे, जो सध्या सोशल मीडियावर खूप व्हायरल होत आहे. दरम्यान, मेलोनी यांनी एक्सवर पोस्ट केलेला (पूर्वीचे ट्विटर) तोच फोटो आता पंतप्रधान मोदींनी रिट्विट करत त्यावर रिप्लाय दिला आहे.
जॉर्जिया मेलोनी यांनी पीएम मोदींसोबत काढलेला सेल्फी फोटो शेअर करताना कॅप्शनमध्ये लिहिले की, COP-28 मधील चांगली मैत्री…#Melodi. यात मेलोनी यांनी आपले आडनाव आणि PM मोदी यांचे आडनाव एकत्र करून #Melodi असा हॅशटॅग तयार केला. याच फोटोला रिप्लाय देत आता पीएम मोदींनी लिहिले की, “मित्रांना भेटणे नेहमीच आनंददायी असते.”
दरम्यान, इटलीच्या पंतप्रधान जॉर्जिया मेलोनी यांनी मोदी आणि मेलोनी या आडनावांचा वापर करून तयार केलेला हॅशटॅग #Melody सध्या सोशल मीडियावर चांगलाच ट्रेंड होताना दिसत आहे. विशेषत: एक्सवर (पूर्वीचे ट्विटर) युजर्स #Melody चा वापर करून मजेशीर पोस्ट, मीम्स शेअर करताना दिसत आहेत.
दरम्यान, COP-28 शिखर परिषदेत सहभागी झालेल्या जागतिक नेत्यांच्या फोटोशूटमध्ये पीएम मोदी आणि जॉर्जिया मेलोनी एकमेकांशी बोलताना आणि हसताना दिसले. या दरम्यानचे अनेक फोटो सोशल मीडियावरही खूप व्हायरल झाले आहेत.
