Pune grandmother’s first metro ride : बहुप्रतिक्षित स्वारगेट मेट्रो स्टेशन अखेर पुणेकरांच्या सेवेसाठी सज्ज झाली आहे. गेल्या आठवड्यात पंतप्रधान नरेंद्र मोदी यांच्या हस्ते व्हिडिओ कॉन्फरन्सिंगद्वारे पुण्यातील सिव्हिल कोर्ट ते स्वारगेट या भूमिगत मेट्रो मार्गाचे लोकार्पण झाले. मेट्रो सुरु झाल्यापासून पुणेकरांनी नव्या मेट्रो स्टेशनला भेट दिली आणि मेट्रो प्रवासाचा आनंद घेतला. अशाच मेट्रो प्रवास करणाऱ्या एका पुणेरी आजींचा व्हिडिओ सध्या सोशल मीडियावर व्हायरल होत आहे. आजींनी पहिल्यांदा पुण्यातील मेट्रोने एकटीने प्रवास केला. आजींच्या चेहऱ्यावरील उत्साह आणि आनंद पाहून तुमच्या चेहऱ्यावर नक्कीच हसू येईल.
पुणेरी आजींचा पहिला मेट्रो प्रवास
पुणे मेट्रो प्रकल्पाच्या सिव्हिल कोर्ट ते स्वारगेट या भुयारी मार्गावर मेट्रो सुरु झाल्यापासून अनेक उत्साही पुणेकर मेट्रो प्रवासाचा आनंद घेत आहे. अशाच एका उत्साही आजींचा व्हिडिओ सध्या सर्वांचे लक्ष वेधून घेत आहे. व्हिडीओमध्ये आजींनी आपला मेट्रो प्रवास कसा होता हे सांगितले आहे. त्या म्हणाल्या की,”मस्तं वाटतंय. मी पहिल्यांदा मेट्रोने प्रवास केला. मंडईच्या बसस्टॉपला उभे होते तेव्हा लोक म्हणाले जा आजी मेट्रोने त्यामुळे मी आले इथे. खूप छान, सुंदर. म्हणजे मी पुण्यात आहे पुण्यातील मंडईत आहे असे वाटतंच नाहीये. सोयी सुविधा छान आहे. वातावरण खूप छान आहे. पुण्यात आहे की परदेशात आहे हेच कळतं नाहीये.”
हेही वाचा – लेकीचं प्रेम! बाबाला नवीन नोकरी मिळाल्यानंतर चिमुकलीला झाला आनंद; ह्रदयस्पर्शी Video एकदा बघाच
येथे पाहा व्हिडीओ
नेटकऱ्यांना प्रचंड आवडला व्हिडीओ
व्हायरल व्हिडिओ इंस्टाग्रामवर chafa__bole_na नावाच्या पेजवर पोस्ट केला आहे. व्हिडिओ शेअर करताना कॅप्शनमध्ये लिहिले आहे की,” पुण्यात नुकतीच स्वारगेट ते जिल्हा न्यायालय मार्गावर मेट्रो सुरू झाली. रस्त्यावरची गर्दी, ट्रॅफिक सर्व काही टाळून पुण्याच्या पोटातून शांतपणे धावणारी मेट्रो पाहण्यासाठी उत्साही पुणेकर भेट देत आहे. अशाच एक उत्साही आजींनी पहिल्यांदा पुण्यातील मेट्रोने प्रवास केला. आजींनी स्वतःचा मेट्रो मध्ये छान फोटो काढला, मेट्रो प्रवासाचा व्हिडिओ केला. आजींना तर आपण पुण्यात नाही परदेशात आहोत असे वाटत होते…त्यांच्या चेहऱ्यावर आनंद स्पष्ट दिसत होता.”
व्हायरल व्हिडीओवर नेटकऱ्यांनी कमेंट केल्या आहेत. एकाने कमेंट केली की,”आजींची (मेट्रो) सफर, एकदम जबर”
दुसऱ्याने कमेंट केली की, “व्वा खूपचं मस्त! प्रवासाचा आनंद आजींच्या चेहऱ्यावर १०० टक्के दिसत आहे.”
