PHOTO : “ताटामध्ये हात घालून…”, असा अपमान फक्त पुण्यातच! वडापावच्या गाडीवरील पुणेरी पाटी वाचून पोट धरून हसाल

तुम्ही पुण्यात कधी फिरायला गेलात तर तुम्हाला अनेक हॉटेल्सबाहेर, दुकानांबाहेर भन्नाट मेसेजच्या पाट्या पाहायला मिळतात. या पाट्यांमधून एकतर लोकांना खोचकपणे सूचना दिल्या जातात किंवा काही गोष्टींविषयी माहिती दिली जाते. या व्हायरल पाटीतून एका वडापाव विक्रेत्याने ग्राहकांना खोचकपणे सूचना केली आहे.

“ताटामध्ये हात घालून भजी खाऊ नये कारण….”

ही पुणेरी पाटी एका वडापावच्या स्टॉलवर लावली आहे. तुम्ही अशा वडापाव स्टॉल्सवर कृपया पैसे सुट्टे द्या, एक्सट्रा चटणी मागू नये, एक्सट्रा चटणीचे एक्सट्रा पैसे, कचरा डब्ब्यात टाका. मात्र, अशाप्रकारे सरळ भाषेत सांगतील ते पुणेकर कसले. अशाच एका पुणेकर वडापाव विक्रेत्याने लावलेली पाटी व्हायरल होतेय. आता तुम्ही म्हणाल, या पाटीवर असं काय लिहिलं आहे? तर या पाटीवर “ताटामध्ये हात घालून भजी खाऊ नये, कारण अच्छे दिन आले आहेत” असा मजकूर लिहिला आहे, जो वाचून वडापाव विक्रेत्याच्या भजीच्या ताटात हात लावताना ग्राहक विचार करेल.

“पूर्वी काय ५ स्टारचा मालक होता की काय…”, पुणेरी पाटीवर लोकांच्या कमेंट्स

पुणेरी पाटीचा हा फोटो सोशल मीडिया प्लॅटफॉर्म इन्स्टाग्रामवर शेअर करण्यात आला आहे. ज्यावर युजर्सही वेगवेगळ्या कमेंट्स करत आहेत. एका युजरने लिहिले की, “पूर्वी काय ५ स्टारचा मालक होता की काय…”, दुसऱ्या युजरने लिहिले की, “ठिकाण सांगण्याची गरज नाही”, तिसऱ्या युजरने लिहिले की, “मास्क घालून भजी घावी, कारण तो (करोना) येतोय. मी पुन्हा येईन, पुन्हा येईन व्हायरल…”, अशाप्रकारे नेटकऱ्यांनीही या व्हायरल पाटीला चांगलीच दाद दिली आहे.

दरम्यान, सुरुवातीला पुण्यातील पेठ्यांमध्येच अशा पुणेरी पाट्या पाहायला मिळायच्या; पण नंतर संपूर्ण पुण्यात या पाट्या प्रसिद्ध झाल्या. या पाट्यांमधून कमीत कमी शब्दांत समोरच्याचा जास्तीत जास्त अपमान करण्याची किंवा खोचकपणे समजवण्याची ही कला पुणेकरांनाच चांगली जमली आहे, त्यामुळे पुणेरी पाट्या हा आता पुणेकरांसाठी गर्वाचा विषय आहे. यातून पुणेकरांची थेट बोलण्याची आणि समोरच्याला कमी शब्दात गप्प करण्याची कला दिसून येते.