आपली स्वप्ने सत्यात उतरवण्यासाठी कठोर परिश्रम हा एकच मार्ग आहे. अनेक जण परिस्थितीमुळे त्यांची स्वप्ने पूर्ण करू शकत नाहीत. पण, काही जण याला अपवाद असतात. जे कठीण प्रसंगातूनसुद्धा त्यांच्या यशाचा मार्ग शोधून काढतात. तर आज सोशल मीडियावर असाच एक व्हिडीओ व्हायरल होत आहे, ज्यात एका व्यक्तीने स्वतःचे स्वप्न पूर्ण केले आहे आणि स्वतःला बांधकाम कामगारापासून सरकारी शिक्षक बनवले आहे.
राजस्थानचे रहिवासी किशन मीना यांनी त्यांच्या इन्स्टाग्राम अकाउंटवरून एक व्हिडीओ शेअर केला आहे. त्यांनी बांधकाम कामगारापासून ते त्यांच्या सरकारी शिक्षकाच्या पोस्टवर जाण्यापर्यंतचे काही खास फोटो शेअर केले आहेत. सुरुवातीला किशन हे इमारतीचे बांधकाम करणारे मजूर होते. फोटोमध्ये ते डोक्यावर अवजड सामान घेऊन जात आहेत. त्यानंतर त्यांनी सुरक्षा रक्षक म्हणूनही काम केलं आहे आणि त्याचवेळी सरकारी शिक्षक पदाची नोकरी मिळवण्यासाठी अभ्याससुद्धा केला. पाहा हा व्हायरल व्हिडीओ.
हेही वाचा…अनोखं टॅलेंट! २० किलो पार्ले-जी बिस्किटांपासून साकारलं अयोध्येतील श्री राम मंदिर; पाहा VIDEO
व्हिडीओ नक्की बघा :
सुरक्षा रक्षक म्हणून काम करत असताना ते वेळात वेळ काढून अभ्यास करायचे. अभ्यास करून त्यांनी ‘राजस्थान स्टाफ सिलेक्शन बोर्ड’ची परीक्षादेखील उत्तीर्ण केली. याचा पुरावा म्हणून त्यांनी फोटोसुद्धा शेअर केला आहे. त्यानंतर अखेर किशन यांचे स्वप्न पूर्ण झाले आणि त्यांना उच्च प्राथमिक शाळेत शिक्षक म्हणून नोकरी मिळाली.
सोशल मीडियावर हा व्हिडीओ @kishan.meena98_official’s या इन्स्टाग्राम अकाउंटवरून शेअर करण्यात आला आहे. तसेच त्यांनी या व्हिडीओला “ना संघर्ष, ना तकलीफ तो ख़ाक मज़ा है जीने में, बड़े–बड़े तूफान थम जाते हैं जब आग लगी हो सीने में” अशी हिंदी भाषेत कविता लिहून त्यांच्या प्रवासाला खास कॅप्शनसुद्धा दिली आहे; जे सोशल मीडियावर अनेकांची प्रेरणा ठरत आहे.
