देशात पहिल्यांदाच २०० रूपयांची नोट चलनात येणार असल्याची घोषणा नुकतीच रिझर्व्ह बँकेने ऑफ इंडियाने केली होती. ही नोट अखेर शुक्रवारी २५ ऑगस्ट रोजी बॅंकांमध्ये दाखल झाली आणि नोटा मिळविण्यासाठी देशभरातील नागरिकांनी ठिकठिकाणी गर्दी केली. या नोटा आपल्याला सगळ्यात आधी मिळाव्यात यासाठी नागरिकांची धडपड सुरु असल्याचे पहायला मिळाले.
१०० आणि ५०० रुपयांच्या मधील मूल्याची नोट देशात पहिल्यांदा आल्याने त्याबाबत सामान्यांमध्ये मोठी उत्सुकता आहे. या २०० रुपयांच्या नोटेचा नमुनाही नुकताच साार्वजनिक करण्यात आला होता. ही नोट सप्टेंबर महिन्यात चलनात आणली जाईल असा अंदाज वर्तवण्यात आला होता, मात्र त्याआधीच ती चलनात आल्याने नागरिकांनी उत्सुकतेने बॅंकेत जाऊन या नोटा मिळविण्यासाठी रांगा लावल्या.
२०० रुपयांची नोट उद्यापासून चलनात; जाणून घ्या कशी असेल !
दुसरीकडे ज्यांना ही नोट मिळाली त्यांनी सोशल मीडियावर आपले २०० रुपयांच्या नोटेबरोबरचे फोटो आणि त्याविषयीची आपली मते व्यक्त केली आहेत. अनेकांनी अशाप्रकारे ५०० रुपयांहून कमी किंमतीची नोट आल्याबद्दल आनंदही व्यक्त केला आहे. तर इतरांनी यो नोटेच्या रंगावरुन आणि चलनाविषयीच्या एकूण सरकारच्या धोरणावरुन सरकरची खिल्लीही उडवली असल्याचे पहायला मिळत आहे.
Me:bhai saab ake 200 ka note dena
Shopkeeper:konse color me pic.twitter.com/N6IoIPtHUF— Vinod (@Confused0_) August 25, 2017
या नोटेचा नेमका रंग कोणता याविषयांच्या चर्चेलाही उधाण आले होते. केशरी रंगातील ही नोट मोदीजी तुम्ही निऑन रंगातही काढा ना असेही एकाने ट्विट केले आहे. इंटरनेटवर या नोटेचे वेगवेगळे रंग फिरत असून त्याचा मूळ रंग केशरी रंगाच्या जवळ जाणाराच असल्याचे स्पष्ट करण्यात आले आहे. याशिवाय आता ९ आणि ९९ रुपयांची नोटही काढा कारण दुकानदार सुटे पैसे देत नाहीत आणि विनाकारण चॉकलेट खावे लागते असेही एकाने म्हटले आहे. याआधी नोटाबंदीनंतर २००० रुपयांची नोट बाजारात आल्यावरही अनेकांनी आपले या नोटेसोबतचे फोटो फेसबुक, इन्स्टाग्राम, व्हॉटसअॅप यांसारख्या सोशल मीडियावर शेअर करत आनंद व्यक्त केला होता.
