Bull Emotional Video : शेतकऱ्याचे बैलांप्रति अतिशय भावनिक असे नाते असते. शेतकऱ्याचा सच्चा सोबती जर कोण असेल ना तर तो बैल असतो. वर्षाचे ३६५ दिवस विनातक्रार तो शेतात मालकासह राबत असतो. ऊन, वारा, पाऊस कशाचीही पर्वा न करता तो नेहमीच कामाला तयार असतो. त्यामुळे मातीला कष्टाशिवाय आणि शेतीला बैलाशिवाय पर्याय नाही, असे म्हटले जाते. शेतकरी आपल्या बैलावर आपल्या मुलांप्रमाणे प्रेम करतो, त्याला काही दुखलं, खुपलं, तर तो त्याची काळजी घेतो. पण, बैल जोपर्यंत शेतात राबतोय, तोपर्यंतच त्याला किंमत असते. असे असले तरी बैलाचा एक असाही व्हिडीओ आता समोर आला आहे, जो पाहिल्यानंतर अनेकांनी सलाम त्या शेतकरी राजाला ज्यानं हे रत्न सांभाळलं, अशी प्रतिक्रिया दिली आहे. कारण- या व्हिडीओतील बैलाची अवस्था पाहून कोणालाही वाईट वाटेल; पण त्या शेतकऱ्यानं बैलाच्या वाईट परिस्थितीतही त्याला एकटं सोडलं नाही. सध्या हा व्हिडीओ चांगलाच व्हायरल होत आहे.
अपंग बैलाचा सांभाळ करणाऱ्या शेतकऱ्याला सलाम
प्राणी मुके असल्याने ते बोलू शकत नाहीत; पण त्यांनाही अडचणी असतात, त्यांनाही दु:ख होतं याची प्रचिती हा व्हिडीओ पाहिल्यानंतर तुम्हाला येईल. यातून शेतकऱ्याचं आपल्या बैलावर किती प्रेम आहे हे समजतं. व्हिडीओत तुम्ही पाहू शकता की, एक अपंग बैल चिखलातून मार्ग काढत जात आहे. उंचीनं कमी असलेला हा बैल एका पायानं अपंग आहे. त्यामुळे चिखलातून चालताना त्याला अडचण येत आहे. पण, तरीही तो न थांबता इतर बैलांच्या मागून हळूहळू चालतोय.
हेही वाचा – तुम्ही रस्त्यावर लिंबू सरबत पिताय? मग हा किळसवाणा Video पाहाच, पुन्हा पिण्यापूर्वी विचार कराल १०० वेळा
बैलाची ही अवस्था पाहून एखाद्या शेतकऱ्यानं त्याला वाऱ्यावर सोडून दिलं असतं; पण हा शेतकरी मात्र आपल्या लेकराप्रमाणे त्या बैलाचा सांभाळ करतोय. त्यामुळे अनेक जण आता अपंग बैलाचा सांभाळ करणाऱ्या शेतकऱ्याला सलाम करीत आहेत. अनेकांनी हा व्हिडीओ पाहून बैलाप्रति दु:ख व्यक्त केलं आहे.
naad_ekch_bailgada_sharyaticha या इन्स्टाग्राम अकाउंटवरून हा व्हिडीओ पोस्ट करण्यात आला आहे, जो पाहिल्यानंतर अनेकांनी अपंग बैलाचा सांभाळ करणाऱ्या शेतकऱ्याचं कौतुक केलं आहे. एका युजरनं लिहिलंय की, दादा, खरंच तुम्ही जी सेवा करीत आहात ना ती पाहता, तुम्हाला परमेश्वर काहीच कमी पडू देणार नाही. दुसऱ्या युजरनं लिहिलंय की, शेतकऱ्यांच्या या श्रीमंतीस अंबानीपण तोड देऊ शकत नाहीत. तिसऱ्या एकानं लिहिलंय की, शेतकरी देवमाणूसच आहे. कोणताही प्रसंग असू दे माघार घेत नाही. चौथ्या एका युजरने लिहिलंय की, मागे वळून बघतो, त्यातच खरं प्रेम दिसतंय मालकाचं.
