सध्या देशभरात चर्चा आहे ती मुकेश अंबानींची मुलगी इशा अंबानीच्या लग्नाची. अंबानी कुटुंबातील एकुलती एक मुलगी असणाऱ्या इशाच्या लग्नासाठी अंबानी कुटुंबाने कोणतीच कसर बाकी ठेवलेले नाही असंच चित्र सध्या दिसून येत आहे. अगदी अमेरिकेच्या माजी राष्ट्राध्यक्षांच्या पत्नीपासून ते भारतीय राजकारण, क्रिडा आणि मनोरंजन क्षेत्रातील अनेक दिग्गजांनी या लग्नाला उपस्थिती लावली. रविवार ते मंगळवारदरम्यान उदयपूरमध्ये या लग्नाच्या आधीचे अनेक विधी पार पडले.

इशाच्या लग्नासाठी अमेरिकेच्या माजी प्रथम महिला हिलरी क्लिंटनही शनिवारीच उदयपूरमध्ये दाखल झाल्या. हिलरी यांनी या लग्न सोहळ्याआधी आयोजित करण्यात आलेल्या संगीत सोहळ्याचा आनंद घेतला. इंटरनेटवर व्हायरल होत असलेल्या अनेक व्हिडीओमधून हिलरी यांचा संगीत सोहळ्यातील उत्साह दिसून येत आहे. उदयपूरमधील सोहळ्यामध्ये बॉलिवूड अभिनेते शाहरुख खान, आमिर खान, करण जोहर, ऐश्वर्या राय बच्चन यांच्याबरोबरच हिलरी क्लिंटन आणि अमेरिकेचे माजी मुख्य सचिव जॉन केरी यांनीही हिंदी गाण्यांवर ताल धरत डान्स केल्याचे दिसत आहे.

या व्हिडीओमध्ये हिलरी क्लिंटन या भारतीय पेहरावामध्ये दिसत आहेत. अनेक अभिनेत्यांच्या गर्दीमध्ये हिलरी यांनी शाहरुख खानबरोबर चक्क हिंदी गाण्यांवर डान्स केल्याचे व्हायरल व्हिडीओत दिसत आहे. ‘लेट्स नाच्चो’, ‘अभी तो पार्टी शुरु हुवी हैं’, ‘तुने मारी एन्ट्री’, ‘जुम्मे की रात हैं’ यासारख्या गाण्यांवर हिलरी यांनी मनसोक्त डान्स केला. व्हिडीओमध्ये निता अंबानी, मुकेश अंबानीही डान्स करताना दिसत आहेत.

हिलरी यांनी रिलायन्स फाऊण्डेशनच्या माध्यमातून सुरु करण्यात आलेल्या स्वदेश बाजार प्रकल्पालाही भेट दिली. देशातील १०८ प्रकारच्या वेगवेगळ्या कलाकृतींच्या विक्रीसाठी उभारण्यात आलेल्या केंद्राला हिलरी यांनी निता अंबानी आणि इशा अंबानीसहीत ९ डिसेंबर रोजी भेट दिली. हिलरी यांच्याबरोबरच अमेरिकन पॉप गायिका बियॉन्सेची उपस्थितीही या सोहळ्यातील खास आकर्षण राहिले.

उदयपूरमधील कार्यक्रमामध्ये हिंदी सिनेसृष्टीतील अनेक कलाकार उपस्थित होते. अनेकांनी या सोहळ्यामध्ये वेगवेगळे परफॉर्मन्स सादर केले. अभिषेक बच्चन, ऐश्वर्या राय, शाहरुख खान, गौरी खान, सलमान खान, करण जोहर यांनी केलेल्या परफॉर्मन्स विशेष गाजले.