Shocking video: असं म्हणतात की आजी आणि नातवंडांचे नाते खूप खास असते. त्यांच्या नात्यात प्रेम, काळजी आणि जिव्हाळा असतो. आजी-आजोबा आणि नात किंवा नातू हे नाते विलक्षण वेगळे असते. नातवाचे पहिले मित्र हे आजी-आजोबाच असतात. नात्याची खरी जडण घडण तिथूनच होत असते. आजी-आजोबांच्या या घट्ट नात्याची ओळख नातवांशी होणे हे आजच्या काळात महत्त्वपूर्ण आहे. आजी म्हणजे नातवंडांची जणू दुसरी आईच असते. मात्र, सध्या समोर आलेला व्हिडीओ पाहून तुम्हालाही धक्का बसेल; कारण छत्तीसगडची राजधानी रायपूर येथील एक अस्वस्थ करणारा व्हिडीओ सोशल मीडियावर व्हायरल होत आहे, ज्यामध्ये एक तरुण आपल्या वृद्ध आजीला क्रिकेटच्या बॅटने बेदम मारहाण करताना दिसत आहे. रायपूरच्या पुरानी बस्ती पोलिसांच्या अखत्यारीतील अमर पुरी भागात ही धक्कादायक घटना घडली असून त्याचा काळीज हेलावणारा व्हिडीओ सध्या सोशल मीडियावर व्हायरल होत आहे.
या व्हिडीओमध्ये तुम्ही पाहू शकता, तो तरुण आपल्या आजीला क्रिकेटच्या बॅटने मारताना दिसत आहे, तिच्यावर अत्याचार करत असताना कोणताही पश्चात्ताप त्याच्या चेहऱ्यावर दिसत नाहीये. तो अतिशय हिंसक पद्धतीने वृद्ध महिलेला मारत आहे. मारल्यानंतर पुन्हा तो तिला इशारा देतो आणि नंतर घरामध्ये परततो. एका संबंधित शेजाऱ्याने या घटनेचा व्हिडीओ रेकॉर्ड केला आणि सोशल मीडियावर पोस्ट केला. व्हिडीओ व्हायरल होताच आरोपी नातवासह कुटुंबातील इतर सदस्यांनी घराला कुलूप लावले आणि ते लपून बसले. या प्रकरणी कोणतीही कायदेशीर कारवाई केल्याचे कोणतेही वृत्त नाही.
माणुसकीला काळिमा फासणाऱ्या अशा अनेक घटना याआधीही समोर आल्या आहेत. मात्र, हा व्हिडीओ पाहिल्यानंतर तुमच्याही तळपायाची आग मस्तकात जाईल.
पाहा व्हिडीओ
सोशल मीडियावर हा व्हिडीओ @Ravimiri1 नावाच्या एक्स अकाउंटवरून शेअर करण्यात आला आहे. यावर नेटकरी संतापले असून वेगवेगळ्या प्रतिक्रिया देत आहेत. एकानं प्रतिक्रिया देताना “संस्कार कमी पडले” अशी प्रतिक्रिया दिली आहे, तर आणखी एकानं “एवढी हिम्मत होतेच कशी”, असा सवाल केला आहे; तर आणखी एका युजरने “अशा नालायक मुलांनाच बॅटने मारा, नंतर एफआयआर नोंदवा आणि शुद्धीवर येईपर्यंत त्याला काही दिवस तुरुंगात पाठवा, अशा मुलांना वेळीच सुधारले नाही तर या स्थितीवर नियंत्रण ठेवता येणार नाही”, अशी संतप्त प्रतिक्रिया दिली आहे.
