Video : घरासमोर भुंकणाऱ्या कुत्र्यावर बिबट्यानं मारली झडप; काही क्षणात झाला पसार, थरारक दृश्य सीसीटीव्हीत कैद!

काय आहे व्हिडीओमध्ये?

हा व्हिडीओ म्हणजे एका घराबाहेरचं सीसीटीव्ही फूटेज आहे. या व्हिडीओमध्ये एका घराबाहेरचं अंगण दिसत असून तिथे एक पाळीव कुत्रा गेटकडे बघून भुंकत असल्याचं दिसत आहे. काही क्षण भुंकल्यानंतर अचानक हे कुत्र भितीने आतल्या बाजूला धावत गेलं. पण अवघ्या काही सेकंदातच समोरच्या किमान पुरुषभर उंचीच्या गेटवरून उडी मारून एक बिबट्या चपळाईनं आत आल्याचं व्हिडीओमध्ये दिसत आहे.

आत येताच बिबट्या थेट कुत्र्याच्या दिशेनं गेला. काही क्षण समोर काहीच दिसत नसताना फक्त कुत्र्याच्या आवाज येतो आणि पाठोपाठ बिबट्या त्या कुत्र्याला त्याच्या जबड्यात पकडून पुन्हा त्याच उंच गेटवर उडी मारून बाहेर जाऊन पसार होत असल्याचं व्हिडीओच्या शेवटी दिसत आहे.

हा व्हिडीओ शेअर करताना परवीन कासवान यांनी “पाहा तो बिबट्या, इतरांना कुठली संधीच नाही. व्हॉट्सअॅपवरून”, असा संदेश लिहिला आहे. हा व्हिडीओ सध्या सोशल मीडियावर व्हायरल होत असून परवीन कासवान यांनी देखील आपल्याला हा व्हिडीओ व्हॉट्सअॅपवरून आल्याचं ट्वीटमध्ये म्हटलं आहे.