…आणि सोनू सूद म्हणाला, “१० मिनिटांत ऑक्सिजन पोहोचतोय भाई”; क्रिकेटपटू सुरेश रैनाने मानले आभार!

बॉलिवुड अभिनेता सोनू सूद यानं गेल्या वर्षी लॉकडाउनच्या काळात केलेलं मदतकार्य आख्ख्या देशानं पाहिलं. मग ते स्थलांतर करणाऱ्या मजुरांसाठी असो किंवा लॉकडाउनमुळे पोटाला उपवास घडणाऱ्या गरजूंसाठी असो, सोनू सूद या हजारो लाखो नागरिकांना मदत करताना दिसून आला आहे. आज ऑक्सिजन, रेमडेसिविर याचा तुटवडा जाणवत असताना गरजू रुग्णांना त्याचा तातडीने पुरवठा करण्याचा प्रयत्न देखील सोनू सूदने सुरू ठेवला आहे. सोनू सूदच्या याच परोपकारी वृत्तीचा ताजा अनुभव घेतलाय तो क्रिकेटपटून सुरेश रैना याने! सुरेश रैनाने ट्विटरवर त्याच्या नातेवाईकासाठी ऑक्सिजन सिलेंडर तातडीने हवा असल्याचं ट्वीट केलं होतं. त्यावर लगेचच सोनू सूदचा रिप्लाय आला आणि त्यानं आवश्यक तिथे ऑक्सिजन पुरवला देखील! यामुळे भारावलेल्या सुरेश रैनाने सोनू सूदचे मनापासून धन्यवाद मानले!