Marksheet Discrepancy in Gujarat: परिक्षेत पेपरमध्ये जशा विद्यार्थ्यांकडून चुका होतात तशाच चुका शिक्षकांकडूनही पेपर तपासताना होतात का? असं झालं तर विद्यार्थ्यांच्या भवितव्याचा प्रश्न गंभीर होईल. मात्र असंच एक प्रकरण गुजरातमधून समोर आलं आहे. यामध्ये प्राथमिक शाळेच्या निकालात मास्तरांचा प्रताप पाहायला मिळाला आहे. गुजरात राज्यातील दाहोद जिल्ह्यातील प्राथमिक शिक्षण विभागाच्या शाळेतील वार्षिक परिक्षा निकालात झालेल्या त्रुटींमुळे वाद निर्माण झाला असून शिक्षण व्यवस्थेच्या गुणवत्तेवरच प्रश्नचिन्ह निर्माण झाले आहे. वंशीबेन मनीषभाई या चौथ्या इयत्तेत शिकणाऱ्या विद्यार्थिनीला तिची गुणपत्रिका मिळाली तेव्हा केवळ विद्यार्थिनीच नव्हे तर तिच्या मित्र-मैत्रिणींसह कुटुंबीयांनाही आश्चर्याचा धक्का बसला. कारण, शाळेतील ढिसाळ कारभाराचा प्रताप म्हणून विद्यार्थिनिला भाषा विषयात चक्क २०० पैकी २११ गुण आणि गणित विषयातही २०० पैकी २१२ गुण प्राप्त झाले होते. घडला प्रकार लक्षात येताच विद्यार्थी गोंधळून तर शाळा प्रशासन भांबावून गेले. गुजरातमधील शालेय विभागाच्या गुणवत्तापूर्ण कामगिरीची पावती असणारे हे गुणपत्र सोशल मीडियावर तुफान व्हायरल झाले आहे.
नेमकं घडलं काय?
उत्तरपत्रिकांचे मूल्यांकन १०० टक्के बिनचूक होणे आवश्‍यक आहे. मंडळाची विश्‍वासार्हता त्यामुळे पणाला लागते. गुजरातमधील वंशीबेन मनीषभाई या चौथ्या इयत्तेत शिकणाऱ्या विद्यार्थिनीने तिची गुणपत्रिका काळजीपूर्वक तपासली असता तिला त्यात ही गंभीर चूक आढळून आली. त्यामुळे तीने ती तिच्या पालकांना दाखवली आणि घडलेली चूक शिक्षकांच्याही निदर्शानास आणून दिली. ज्यामध्ये तिला गुजराती भाषा या विषयात २०० पैकी २११ गुण आणि गणित विषयातही २०० पैकी २१२ गुण मिळाले.
शालेय प्रशासनाने सुधारली चूक
त्यानंतर शालेय प्रशासनाची एकच धावपळ उडाली. त्रुटी लक्षात आल्यानंतर शालेय प्रशासनाने ती दुरुस्त केली आणि तिला गुजराती भाषा विषयात २०० पैकी १९१ गुण आणि गणितातील २०० पैकी १९० गुण अशी दुरुस्ती करण्यात आली. तसेच, उर्वरित विषयांचे गुण अपरिवर्तित ठेवण्यात आले. सुधारित निकालासह, वंशीबेनचे एकूण गुण १००० पैकी ९३४ इतके होते.
पाहा उत्तरपत्रिका
हेही वाचा >> VIDEO: “आईबापाला घोटभर पाणी न देणारं पोरगं..” पुण्यात नेत्यांच्या प्रचाराला जाणाऱ्या तरुणांना भर चौकात लगावला टोला
याआधीही गुजरातमधील दहावी आणि बारावीच्या बोर्ड परीक्षांच्या उत्तरपत्रिकांचे मूल्यांकन करताना गुण जोडण्यात चुका केल्याबद्दल दोन वर्षांच्या कालावधीत ९ हजाराहून अधिक शिक्षकांना १.५४ कोटींचा एकत्रित दंड ठोठावण्यात आला होता.
तपास सुरू
दरम्यान, त्रुटीच्या प्रत्युत्तरात, जिल्हा शिक्षण अधिकाऱ्यांनी कारण ओळखण्यासाठी आणि भविष्यात अशा घटना टाळण्यासाठी उपाययोजना लागू करण्यासाठी तपास सुरू केला आहे.