बाईक असो वा कार कोणतेही वाहन चालवताना वातुकीच्या नियमांचे पालन करणे आवश्यक असते. शिवाय वाहनं चालवताना आपल्याकडून थोडा जरी निष्काळजीपणा झाला तर त्याचे खूप गंभीर परिणाम भोगावे लागतात. सोशल मीडियावर वाहनांच्या अपघाताचे अनेक व्हिडीओ व्हायरल होत असतात. यातील काही अपघात समोरच्या ड्रायव्हरच्या चुकीमुळे झालेले असतात तर काही आपल्या चुकीमुळे झालेले असतात. सध्या असाच एक व्हिडीओ मोठ्या प्रमाणात व्हायरल होत आहे. ज्यामध्ये कारचा दरवाजा उघडतानाचा आपला छोटासा निष्काळजीपणा किती महागात पडू शकतो याचं उदाहरण पाहायला मिळत आहे.
आपण आपल्या कारचा दरवाचा अनेकदा मागे न पाहता उघडतो, ज्यामुळे भीषण अपघात होऊ शकतो. असाच एक व्हिडिओ सोशल मीडियावर व्हायरल होत आहे. जो पाहून तुमच्याही अंगावर शहारे येऊ शकतो. या व्हिडिओमध्ये एका कारचा भीषण अपघात झाल्याचं पाहायला मिळत आहे. व्हिडीओतील महिलेने रहदारीच्या रस्त्यावर आपली कार उभी केल्याचं दिसत आहे. यावेळी त्या रस्त्यावरुन अनेक वाहनं ये-जा करताना दिसत आहे. यावेळी कारमधील महिला मागे न पाहता थेट कारचा दरवाजा उघडते, ज्यामुळे मागून येणारी भरधाव कार दरवाज्याला धडक देते आणि भीषण अपघात होतो. या धक्कादायक अपघाताचा सर्व थरार सीसीटीव्हीमध्ये कैद झाला आहे. ज्याचा व्हिडीओ आता व्हायरल होत आहे.
महिलेच्या निष्काळजीपणामुळे झालेल्या भीषण अपघाताचा व्हिडीओ @crazyclipsonly नावाच्या इन्टाग्राम अकाऊंटवरुन शेअर करण्यात आला आहे. हा व्हिडीओ पाहिल्यानंतर गाडीचा दरवाचा उघडताना खबरदारी घेणं किती महत्वाचं आहे हे पाहायला मिळत आहे. शिवाय आपली थोडीशी चूकदेखील भीषण अपघाताचे कारण बनू शकते याचेचं उदाहरण म्हणजे हा व्हिडीओ असल्याचं नेटकरी म्हणत आहेत. या अपघाताचा व्हिडीओ आतापर्यंत ५.७ लाखांहून अधिक लोकांनी पाहिला आहे, तर हजारो लोकांनी तो लाईक केला आहे. तसंच अनेक नेटकरी व्हिडीओवर वेगवेगळ्या प्रतिक्रिया देत आहेत.
