Coldplay frontman Chris Martin: नेरुळ येथील डॉ. डी. वाय. पाटील स्पोर्ट्स स्टेडियम ‘कोल्डप्ले’ या जागतिक दर्जाच्या संगीत कार्यक्रमाचे आयोजन करण्यात आले आहे. बहुप्रतिक्षित अशा या कार्यक्रमाची गेल्या अनेक महिन्यांपासून तयारी सुरू होती. १८, १९ आणि २१ जानेवारी रोजी तीन दिवस हा कॉन्सर्ट नवी मुंबईत होत असून जवळपास दोन लाखाहून अधिक चाहते या संगीत सोहळ्याला हजेरी लावणार असल्याचे सांगण्यात येत आहे. यावेळी बँडचा प्रमुख गायक ख्रिस मार्टिनने भारतीय श्रोत्यांचे स्वागत केलेच, त्याशिवाय भारतात ब्रिटिशांची वसाहत असताना जे अन्याय-अत्याचार झाले, त्याबद्दलही भाष्य केले. ख्रिस मार्टिनच्या या विधानानंतर श्रोत्यांनीही त्यांला दाद दिली. तसेच ख्रिस मार्टिनने एकदा ‘जय श्री राम’ असाही नारा दिला. या दोन्ही संवादाचे व्हिडीओ आता सोशल मीडियावर व्हायरल होत आहेत.
एक्सवर ख्रिस मार्टिनचा एक व्हिडीओ शेअर केला जात आहे. त्यात तो म्हणाला, “ब्रिटिशांनी भारतात केल्यानंतरही तुम्ही आम्हाला माफ केले, याबद्दल आपला आभारी आहे.” ख्रिस मार्टिनने पुढे म्हटले, आमचा भारतातला हा चौथा दौरा आहे. तसेच दुसऱ्यांदा आम्ही कॉन्सर्ट घेत आहोत. आज तुम्ही सर्व इथे मोठ्या संख्येने आलात, त्याबद्दल आपले धन्यवाद.
याच कॉन्सर्टमध्ये ख्रिस मार्टिनने एकदा ‘जय श्री राम’चाही नारा दिला. याचाही व्हिडीओ सोशल मीडियावर शेअर केला जात आहे. गाण्याच्या सादरीकरणादरम्यान मंचावरुन फिरत असताना एका चाहत्याच्या हातातील फलक बघून ख्रिस मार्टिनने त्याकडे बोट दाखवत ‘जय श्री राम’ म्हटले. तसेच एका गाण्याचे सादरीकरण केल्यानंतर ख्रिस मार्टिनने हिंदी श्रोत्यांना साद घालत शुक्रिया असे म्हटले. त्यानंतरही श्रोत्यांनी त्याला दाद दिली.
ख्रिस मार्टिनने ब्रिटिश राजवटीबाबत केलेल्या विधानावर आता सोशल मीडियावर चांगलीच चर्चा रंगली आहे. अनेक युजर्सनी वेगवेगळ्या प्रतिक्रिया दिल्या आहेत. एका युजरने म्हटले की, “ख्रिसनं जे केलेले नाही, त्याबद्दल तो माफी मागतोय.” दुसऱ्या एका युजरने म्हटले की, ख्रिसने माइक, स्टेज आणि संगीताच्या माध्यमातून भूतकाळातील जखमांवर फुंकर घातली.
कोल्डप्लेचा नवी मुंबईतील शेवटचा शो २१ जानेवारी रोजी होणार आहे. त्यानंतर २५ आणि २६ जानेवारी रोजी अहमदाबादमध्ये कॉन्सर्ट होईल.
