“लग्नाचं वय निघून जात आहे, मुली मिळेनात…” पोलीस हवालदाराने लिहिलेला रजेचा अर्ज सोशल मीडियावर व्हायरल

मिळालेल्या माहितीनुसार हे प्रकरण उत्तर प्रदेशातील फारुखाबाद जिल्ह्यातील आहे. येथील कादरीगेट पोलीस स्टेशनमध्ये तैनात असलेले हवालदार राघव चतुर्वेदी यांनी सीओ सिटीकडे पाच दिवसांच्या रजेसाठी अर्ज केला होता. अर्जात हवालदाराने लग्नासाठी मुलगी बघायला जाण्यासाठी सुट्टी मागितली आहे. हवालदाराने रजेच्या अर्जात लिहिले आहे, “माझ्या वडिलांनी फोनवरुन कळवले आहे की ते माझ्यासाठी मुलगी बघायला जाणार आहेत. मला पोलिसात नोकरीला लागून तीन वर्षे झाली असून अद्याप माझे लग्न झालेले नाही. शिवाय पोलीस मुलांसाठी लग्नाचे प्रस्तावही जास्त येत नाहीत. खूप दिवसांनी एक चांगले स्थळ आले आहे. आता माझे लग्नाचे वय देखील निघून जात आहे. त्यामुळे कृपया मला पाच दिवसांची रजा द्यावी ही विनंती आहे. सर, तुमचे खूप उपकार होतील”

हेही पाहा- तिकिटाचे पैसे परत द्या! शाहरुख खानचा ‘जवान’ चित्रपट पाहिल्यानंतर प्रेक्षकांच्या लागल्या रांगा, पण का? पाहा Video

हवालदार राघवचा अर्ज सीओ सिटीने स्वीकारला असून पाच दिवसांची रजा देखील मंजूर केली आहे. कॉन्स्टेबल राघव चतुर्वेदी रजा मंजूर झाल्यानंतर त्याच्या मूळ गावी गेला होता. या संपूर्ण प्रकरणाबाबत एका खासगी टीव्ही चॅनलने सीओ सिटी प्रदीप सिंग यांच्याशी फोनवर चर्चा केली. तेव्हा ते म्हणाले, “कादरी गेट पोलिस स्टेशनमध्ये तैनात कॉन्स्टेबल राघव चतुर्वेदी यांनी लग्नासाठी मुलगी पाहण्यासाठी रजेचा अर्ज दिला होता. जो मी मंजूर केला असून त्याला पाच दिवसांची रजा देण्यात आली आहे. हवालदाराचा रजेचा अर्ज योग्य होता, त्यामुळे त्याला रजा मिळणे गरजेचं होते.”