लोक कशा-कशासोबत सेल्फी घेतील याचा काही नेम नाही. पुतळे तर सोडून द्या अगदी गोठ्यात बांधलेल्या गुरांना देखील सेल्फी वेड्यांनी सोडले नाही. अशा महाभागांचे सेल्फी सोशल मीडियावर व्हायरल होतात. व्हायरल तर सोडाच पण त्यांच्यावर विनोद करून त्यांचे हसे होते ते वेगळेच. हा सेल्फी म्हणजे याचे उत्तम उदाहरण आहे. या सेल्फीमध्ये दिसणारे महान व्यक्तीमत्त्व नेमके कोण हे कळले नसले तरी सोशल मीडियावर मात्र त्यांची चांगलीच खिल्ली उडवली जात आहे. हेल्मेट घातले नाही म्हणून पोलिसांनी या दोन्ही दुचाकीस्वारांवर कारवाई केली. पण पोलिसांचे लक्ष नसताना हे दोघेही सेल्फी घेण्यात व्यस्त आहे. पोलीस अधिकारी दंडाची पावती फाडण्यात व्यस्त आहेत. तेव्हा हे दोघेही पोलिसांची नजर चुकवून त्यांच्यासोबत सेल्फी घेत आहेत. वेळ काय, प्रसंग काय याचे कोणतेही भान या दोघांनाही नाही त्यामुळे या दोघांना ‘सेल्फी ऑफ द इअर’चा पुरस्कारच द्या अशा टीका सोशल मीडियावर होत आहे. अशा प्रकारे सेल्फी काढणारे हे काही पहिलेच नाहीत.
पॅरिस हल्ल्याच्यावेळी काही नागरिकांना दहशतवाद्यांनी ओलिस ठेवले होते. अशा परिस्थितीतही ओलिसांपैकी एका तरूणीने देखील सेल्फी काढून तो सोशल मीडियावर अपलोड केला होता. तेव्हा तिच्यावरही जगभरातून खूप टिका झाली होती. काही महिन्यांपूर्वी एका तरूणाने चक्क आपल्या मृत काकांच्या प्रेताशेजारी बसून सेल्फी काढला होता. आपल्या काकाचे निधन झाले आहे अशी ओळ लिहून त्याने तो सोशल मीडियावर टाकला होता, त्यानंतर त्याच्या असंवेदनशील वागण्यावर टीकेची झोड उठली होती.
