Tomato Price Hike: सध्या टोमॅटोच्या दरात मोठी वाढ झाल्याचे पाहायला मिळत आहे. महाराष्ट्रात टोमॅटोचे दर हे प्रतिकिलो १०० ते १२० रुपयांच्या आसपास आहेत. टोमॅटोच्या वाढलेल्या दरामुळं सर्वसामान्यांची खिशाला कात्री लागत आहे. त्यामुळं ग्राहकांनी टोमॅटो खरेदीकडे पाठ फिरवली आहे. मध्य प्रदेशात टोमॅटोच्या किमती वाढल्यानंतर आता शहरातील मोबाईल विक्रेत्याने ग्राहकांसाठी भन्नाट ऑफर आणली आहे. या दुकानचालकाने स्मार्टफोन खरेदीवर २ किलो टोमॅटो मोफत देण्याची ऑफर आणली आहे. या अनोख्या ऑफरची सर्वत्र चर्चा होत आहे. सध्या ही जाहिरात सोशल मीडियावर लक्ष वेधून घेत आहे.
मोबाईल शोरुमच्या दुकानात मोबाईल खरेदीवर टोमॅटो ऑफर देण्यात आली आहे. मध्य प्रदेशातील अशोक नगर येथील एका मोबाईल शोरुममध्ये ही ऑफर देण्यात आलीय. मोबाईल शोरूम ऑपरेटरने स्मार्टफोन खरेदीवर २ किलो टोमॅटो मोफत देण्याची घोषणा केली आहे. शहरात टोमॅटोचे भाव १६० रुपयांच्या पुढे गेले असून त्यामुळे लोकांनी मोबाईल खरेदीसाठी शोरूममध्ये गर्दी केली.
मोबाईल शॉपीतील तरुण व्यावसायिक अभिषेक अग्रवाल यांनी सांगितले की, आजच्या युगात ग्राहकांना आकर्षित करण्यासाठी मोबाईल शोरूममध्ये विविध ऑफर्स दिल्या जातात. अशा स्पर्धेच्या काळात जेव्हा आम्हाला कळले की टोमॅटोचे भाव वाढले आहेत आणि भाजी मंडईत टोमॅटो १६० रुपये किलोने विकला जात आहे, तेव्हा आम्ही ठरवले आहे की आम्ही ग्राहकांना मोबाईल खरेदीवर २ किलो टोमॅटो मोफत देऊ.
पाहा फोटो
शोरूमचालक सांगतात की, जेव्हापासून त्यांनी ही योजना लागू केली आहे, तेव्हापासून ग्राहकांची संख्या वाढली आहे. दरम्यान उत्तर प्रदेश आणि हरियाणासारख्या राज्यांमधून टोमॅटोचा पुरवठा खूपच कमी झाला आहे. आता टोमॅटो बेंगळुरुहून आयात केली जात आहेत. नुकत्याच झालेल्या पावसामुळे टोमॅटो पिकाचे मोठे नुकसान झाले आहे. त्यामुळं दरात वाढ झाल्याची माहिती बाजारातील टोमॅटो व्यापाऱ्यांनी दिली आहे. दरम्यान, येत्या काही दिवसांत टोमॅटोच्या दरात घट होण्याची शक्यता जाणवत नाही. पुढच्या काही दिवसात टोमॅटोचे नवीन पीक बाजारात येणार आहे. पण हिमाचल प्रदेश किंवा अन्य उत्पादक प्रदेशात जोरदार पाऊस झाला तर टोमॅटोचे दर असेच वाढत राहण्याची शक्यता आहे.
