रशियाचे राष्ट्राध्यक्ष व्लादीमीर पुतिन यांनी मागील आठवड्यामध्ये युक्रेनविरोधात युद्धाची घोषणा केल्यानंतर युक्रेनवर रशियन फौजांनी हल्ला केला. युक्रेनची राजधानी असणाऱ्या किव्हवर चाल करुन जात असणाऱ्या रशियन सैन्यालाच आता या युद्धामध्ये अनेक अडचणींचा सामना करावा लागतोय. कुठे इंधन संपल्याने बंद पडलेले रणगाडे तर कुठे दिशाहीन झालेल्या फौजा असं चित्र रशियन सैन्यासंदर्भात सध्या दिसत आहे. त्यात मूळ रशियन भूमीपासून दूर आल्याने रसद आणि दारुगोळ्याची टंचाईसुद्धा जाणवत असल्याच्या बातमी समोर येत आहेत. अशाच रशियन लष्कराची दयनीय अवस्था दाखवणार आणखीन एक व्हिडीओ समोर आलाय. या व्हिडीओमध्ये चक्क एक शेतकरी आपल्या ट्रॅक्टरने बंद पडलेला रशियन रणगाडा ओढताना दिसतोय.
नक्की वाचा >> Ukraine War: “पंतप्रधान मोदी हिंमत दाखवून पुतिन यांना…”; भाजपा खासदाराने निशाणा साधत विचारला प्रश्न
सोशल मीडियावर व्हायरल झालेल्या या व्हिडीओमध्ये एका रणगाड्याला दोरखंडाने बांधून एक शेतकरी तो टोईंग केल्याप्रमाणे आपल्या ट्रॅक्टरने खेचत घेऊन चालल्याचं दिसतंय. हा व्हिडीओ अनेकांनी शेअर केला असून त्यात ब्रिटीश खासदार जॉनी मेर्कर यांचाही समावेश आहे. “मी काही तज्ज्ञ नाही पण रशियाने केलेलं हे आक्रमण फारसं प्रभावी ठरताना दिसत नाहीय. आज एका युक्रेनियन ट्रॅक्टरने रशियाचा रणगाडा चोरुन नेला,” अशा कॅप्शनसहीत ब्रिटीश खासदाराने हा व्हिडीओ शेअर केलाय.
नक्की पाहा हे फोटो >> Photos: कोणी म्हणतंय हिटलर तर कोणी म्हणतंय नरकात जळणार; जगभरातील Anti-Putin मोर्चांमधील पोस्टर्स पहिलेत का?
नक्की पाहा >> Video: रणगाडा बंद पडल्याने अडून पडलेल्या रशियन सैनिकांजवळ येऊन युक्रेनियन चालक म्हणाला, “मी तुम्हाला…”
युक्रेनचे ऑस्ट्रियामधील राजदूत ओलेजेंट स्चेर्बा यांनीही हा व्हिडीओ शेअर केलाय. कदाचित हा शेतकऱ्याने चोरलेला पहिला रणगाडा असावा, अशी मजेदार प्रतिक्रिया त्यांनी हा व्हिडीओ शेअर करताना दिलीय. इंधन संपल्याने हा रणगाडा सैनिक रस्त्यामध्ये असाच सोडून निघून गेल्याचा अंदाज व्यक्त केला जातोय. त्यामुळेच हा रणगाडा आपल्या ट्रॅक्टरला बांधून युक्रेनियन शेतकरी घेऊन गेल्याचं सांगितलं जात आहे.
नक्की वाचा >> Ukraine War: पुतिन यांना मोठा धक्का! झेलेन्स्कींच्या हत्येसाठी पाठवलेल्या ‘चेचेन स्पेशल फोर्स’चा युक्रेनकडून खात्मा
हा व्हिडीओ युक्रेनच्या नेमक्या कोणत्या प्रांतातील आहे आणि तो कोणी शूट केलाय याची माहिती समोर आलेली नसली तरी तो मागील काही दिवसांमध्येच शूट करण्यात आल्याचं सांगितलं जातंय. या व्हिडीओवरुन अनेकांनी देशाच्या रक्षणासाठी समोर आलेले युक्रेनियन नागरिक आता रशियन लष्कराच्या वस्तू ताब्यात घेत देशासाठी लढत असल्याचा अंदाज व्यक्त केलाय. “हे युद्ध म्हणजे रशियन लष्करासाठी आकडेवारीचा आणि पुरवठ्याचा गोंधळ ठरत आहे. अनेक रशियन रणगाड्यांमधील इंधन संपलं असून अनेक सैनिकांना रसदही पुरवली जात नाहीय. त्यामुळेच अशाप्रकारे रणगाडे पळवले जातायत,” असं एका युझरने म्हटलंय.
