सहा वर्षाच्या मुलाच्या छातीवर लाथ मारल्यामुळे केरळमधील एका व्यक्तीला अटक करण्यात आली आहे. या मुलाची चूक केवळ हीच होती की तो या इसमाच्या गाडीला टेकून उभा राहिला होता. या गोष्टीचा राग आल्याने या व्यक्तीने अतिशय निर्दयी पद्धतीने मुलाच्या छातीत लाथ मारली. संबंधित घटना सीसीटीव्ही कॅमेरामध्ये कैद झाली आहे.
एका गजबजलेल्या रस्त्याच्या कडेला एक पांढरी कार उभी होती. एक लहान मुलगा या गाडीला टेकून उभा होता. याचवेळी गाडीचा मालक बाहेर आला आणि त्याने या मुलाला गाडीला टेकलेले पाहिले. मुलगा आपल्या गाडीला टेकलेला आहे हे पाहून या व्यक्तीला राग अनावर झाला आणि त्याने मुलाला लाथ मारली. यानंतर हा मुलगा गुपचूप तिथून निघून जाऊ लागला. गाडीचा मालकही गाडीजवळ गेला. मात्र घडलेली घटना पाहून आजूबाजूच्या लोकांनी लगेचच गाडीकडे धाव घेतली.
आजूबाजूला असलेल्या स्थानिकांनी गाडीला घेरले आणि आरोपीला त्याने केलेल्या कृतीचा जाब विचारू लागले. आरोपीने मात्र तेथून पळ काढण्याचा प्रयत्न केला. कारचालकाचे नाव शिहशाद असून तो किपोन्नयामपालम येथील रहिवासी आहे. या घटनेनंतर पोलिसांनी आरोपीवर गुन्हा दाखल करून त्याला ताब्यात घेतले आहे. पीडित लहान मुलगा राजस्थानच्या एका श्रमिक कुटुंबाचा सदस्य आहे.
विमानातून प्रवास करणं प्रवाशाला चांगलंच महागात पडलं; सुटकेसची अवस्थापाहून तुम्हालाही फुटेल घाम
पेशाने वकील असलेल्या एका प्रत्यक्षदर्शीने रात्री साडे आठच्या सुमारास पोलिसांना घडलेल्या घटनेची माहिती दिली. त्यानंतर शिहशादला पोलिस ठाण्यात बोलावण्यात आले, मात्र नंतर त्याला सोडून देण्यात आले. दरम्यान, या घटनेचे सीसीटीव्ही फुटेज सोशल मीडियावर व्हायरल झाल्यानंतर पोलिसांवर जोरदार टीका होऊ लागली. त्यानंतर पोलिसांनी कारवाई करत शुक्रवारी सकाळी आरोपीला ताब्यात घेतले.
